भांगरभूंय | प्रतिनिधी
कोडागु, खबरां संस्था: एका वेवसायिकाची कूड पुलिसांक अर्दवट लाशिल्ले अवस्थेंत सांपडिल्ली. ह्या प्रकरणांत पुलिसांनी त्या वेवसायिकाचे दुसरे बायलेक आनी हेर दोगांक अटक केल्या.
खंय घडली ही घडणूक?
ह्या वेवसायिकाची कूड पुलिसांक कोडागु जिल्ह्यांत सांपडली. ताचे दुसरे बायलेन आठ कोटींची मालमत्ता हडप करपाक ताका मारून उडयलो. उपरांत ताची कूड ती ८४० किमी पयस घेवन गेली.
पुलिसांनी दिल्ले म्हायती प्रमाण, ८ ऑक्टोबराक पुलिसांक कॉफी इस्टेट भागांत ही कूड सांपडली. पुलिसांनी तिची वळख पटोवपाचो यत्न केलो तेन्ना ती कूड ५४ वर्सां पिरायेच्या रमेश नांवाच्या मनशाची आशिल्ल्याचें कळ्ळें. तो वेवसायीक हेंय समजलें. उपरांत पुलिसांनी दुबावितांचो सोद घेवन ह्या प्रकरणांत रमेशची दुसरी बायल निहारीका आनी तिचे वांगडी डॉ. निखिल राणा आनी अंकुर राणा ह्या दोगांक अटक केली. तिगूय दुबावीत बंगळुरूंत रावतात. मागीर ह्या खुना फाटलें कारण पुलिसांक समजलें.
कूड सांपडले उपरांत कितें घडलें?
कूड मेळ्ळे उपरांत पुलिसांनी चार पंगड तयार केले. ते कूड कोणाची? खून कसो जालो? कोणें केलो? ह्या प्रस्नांच्यो जापो सोदताले. हे खातीर सीसीटीव्ही फुटेजूय तपासल्यो. हजारांनी गाडयो मदीकेरी, सुनीतीकेप्पा, कुशलनगर आनी माधपूर हांगा वतना दिसताल्यो. दुबावितांक धरपाक पुलिसांनी कोनश्यान कोनसो सोदलो. तेन्ना पुलिसांक समजलें, रमेशाच्या नांवाचेर तांबड्या रंगाची बेज कार आशिल्ली आनी तेच गाडयेन ताची कूड आशिल्ली. उपरांत पुलिसांक कळ्ळें निहारिका नांवाची रमेशाची दुसरी बायल आसा. उपरांत तिका आनी तिच्या दोगा वांगड्यांक अटक केली.
निहारीकान घोवाक मारलो?
निहारीका ही २९ वर्सां पिरायेची लग्न जाल्ली बायल. ती १६ वर्सांची आसली तेन्ना तिच्या बापायक मरण आयलें. तिचे आवयन दुसरें लग्न केलें. उपरांत निहारिकाचेंय लग्न जालें. तिका पूत आसा. मात तिच्या लग्नांत जायत्यो समस्या निर्माण जाल्यो. उपरांत तिणें घटस्फोट घेतलो. निहारीकान इंजिनिअरींग केल्लें. तशेंच तिणें जायत्या कंपनींनी नोकरीय केल्ली. निहारिकान अंकुराचे मजतीन रमेशाचो जीव घेतलो. १ ऑक्टोबराक निहारीकान गळो दामून ताचो खून केलो. उपरांत ताची कूड घेवन ८४० किमीचो प्रवास केलो आनी ती कडू कॉफी इस्टेटींत लासपाचो यत्न केलो. आतां पुलिसांनी आरोपींक अटक केल्या. घोवाची ८ कोटीची मालमत्ता हडप करपाक तिणें हें सगळें केल्ल्याचें समजता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
