भांगरभूंय | प्रतिनिधी
हैदराबाद : तेलंगणांतल्या मेडक जिल्ह्यांतल्या न्यायालय इमारतींतल्यान उडी घेतिल्ल्यान एके बायलेक जीव वगडावचो पडलो. तशेंच तिचो घोव आनी दोगां भुरगीं गंभीर जखमी आसात. ही घडणूक घडटांच थळाव्यांनी जखमींक मेडक शासकीय हॉस्पिटलांत दाखल केलें. मात तांची भलायकी गंभीर आशिल्ल्यान दोतोरांनी फुडल्या उपचारा खातीर तांकां हैदराबादाक धाडल्यांत. पुलिसांनी घडणुके सुवातेर पावन तपास सुरू केला.
मृत महिला राम्या हिचो मूळ गांव रामयंपेट-लक्ष्मापूर. तिचो घोव नवीन हो दौलताबादचो. तीं दोगांय मोगान लग्न जाल्लीं. मात घरांतल्या वादाक लागून तीं सध्या वेगळीं रावतालीं. फाटल्या वर्सा नवीन हांणी राम्याच्या कुटुंबाक धमकावपा खातीर लक्ष्मापूर हांगच्या तिच्या घराचेर गांवठी स्फोट (बॉम्ब) उडयिल्ल्याचो आरोप आसा. हे घडणुके उपरांत नवीनाक बंदखणींतूय वयचें पडिल्लें. तेन्नाच्यान त्या दोगांय घोव-बायले मदीं सेगीत वाद जाताले, अशी म्हायती पुलिसांनी दिली. सध्या हे घडणुकेचो पुलीसांनी खोलायेन तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
