भांगरभूंय | प्रतिनिधी
तेलंगण: तेलंगणाच्या महबुबाबाद जिल्ह्यांतलें एक जोडपें फाटलीं २२ वर्सां जालीं दर वर्सा आपल्या मरण आयिल्ल्या पूत आनी ताचे इश्टिणी खातीर प्रतिकात्मक लग्न सुवाळो घडोवन हाडटा. ह्या खाशेल्या विधीक आतां गांवच्या लोकां सयत वाठारांतले जायते लोक हाजीर रावतात.
लालू आनी सुक्कम्माचो पूत राम कोटी हाणें २००३ वर्सा आत्महत्या केल्ली. तांच्या मोगाच्या संबंदाक चलयेच्या कुटुंबान विरोध केल्लो. हे घडणुके उपरांत सुमार २० दिसांनी चलयेनूय आत्महत्या केल्ल्याची म्हायती मेळ्ळी.
हे घडणुकेक लागून कुटुंब पुरायेन खचून गेलें. सुक्कम्माच्या मतान तिचो पूत सपनांत तिचे कडेन आयलो आनी ताणें देवूळ उबारपाची आनी लग्न करपाची इत्सा उक्तायली. ते उपरांत ह्या जोडप्यान आपल्या घरांत एक ल्हान देवूळ बांदून राम कोटी आनी ताचे इश्टीणीची मुर्ती लायली.
तेन्ना सावन दर वर्सा श्रीराम नमीच्या दिसा ह्या मुर्तींचो परंपरीक ‘कल्याणम्’ (लग्न) सुवाळो करतात. पुजा, प्रसाद, लग्न ह्यो सगळ्यो चालीरिती आनी परंपरा पाळून ही विधी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
