भांगरभूंय | प्रतिनिधी
वेंचणूक जाहीरनाम्यांत घोशणांचो येवंक शकता हुंवार
हैदराबाद, खबरां संस्था : तेलंगण काँग्रेस आपल्या वेंचणूक जाहीरनाम्यांत चलयांच्या लग्नांत एक तोळो (10 ग्राम) भांगर दिवपाची घोशणा करपाक शकता. विद्यार्थ्यांक फुकट इंटरनॅट पॅकेजीचें आस्वासन दिवंक शकता. खबरां एजन्सी पीटीआयन तेलंगण प्रदेश काँग्रेस समितीचे अध्यक्ष डी श्रीधर बाबू हांच्या हवाल्यान ही म्हायती दिल्या. तेच बरोबर काँग्रेस जाहीरनामो समितीचो एक वांगडी म्हणटा, आमी सत्तेर आयल्यार विद्यार्थ्यांक फुकट इंटरनॅट दिवपा खातीर सेवा पुरवणदार कंपनीं कडेन चर्चा करतले.
केसीआर सरकार चलयांक दिता एक लाख
तेलंगणांत मुख्यमंत्री आनी भारत राष्ट्र समितीचे मुखेली के चंद्रशेखर राव हांचें सरकार ‘कल्याण लक्ष्मी’ आनी ‘शादी मुबारक’ येवजण्यो चलयता. हाचे खाला तेलंगणांतल्या चलयांक (18 वर्सां पुराय केल्ल्या) लग्नाच्या वेळार 1 लाख 116 रुपया दिवपाचें काम सुरू आसा. हातूंत आवय- बापायचें वर्सुकी उत्पन्न 2 लाख रुपयां परस उणें आशिल्ल्या चलयांक मजत करतात.
बीआरएस म्हणटात- काँग्रेस कसलेंय उतर दिवंक शकता
काँग्रेसीच्या संभाव्य आश्वासनां विशीं बीआरएसचे म्हणयारे श्रवण दासोजू हांणी म्हणलें, कर्नाटक काँग्रेस सरकाराक वेंचणुकेचें उतर पाळपाक अपेस आयलां. ते चंद्र सोडून हेर कसलेंय उतर दिवंक शकतात. तेलंगणाचो मुख्यमंत्री आपल्या खाशेल्या येवजण्यां खातीर आनी ताचे अंमलबजावणी खातीर वळखतात. मुख्यमंत्री केसीआर गरीबां खातीर येवजण्यो हाडटात, जाचो विचार हेर पक्ष करपाकूच शकनात. केसीआर गरिबां विशीं खूब उदार आनी दयाळू आसात.
बीआरएसाचे रु. 400 त सिलिंडराचें वचन
मुख्यमंत्री केसीआर हांणी पयर आपल्या पक्षाचो जाहीरनामो जाहीर केलो. एलपीजी सिलिंडर 400 रुपयांक मेळटलो, तशेंच 15 लाखांची भलायकी कव्हर दितले अशें सांगिल्लें. तशेंच दलीत बंधु येवजणे खाला दरेका कुटुंबाक 10 लाख रुपया दितले. केसीआर विमो येवजणे खाला 93 लाख बीपीएल कुटुंबांचो दरेकी 5 लाख रुपया विमो करतले. समाजीक पेन्शन 5 हजार रुपया मेरेन वाडयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
