भांगरभूंय | प्रतिनिधी
कामारेड्डी : तेलंगणाच्या कामारेड्डी जिल्ह्यांतल्या महामार्गा लागसार आशिल्ल्या एका ढाब्यार विखबाधा जाले उपरांत वट्ट १५ माकडांक मरण आयलें. जाल्यार आनीक ८० माकड गंभीर जखमी जाले.
थळाव्यांच्या म्हणण्या प्रमाण, जिवे आशिल्ले माकड सामके वायट अवस्थेंत सांपडले. तांकां चलपाकूय जायनाशिल्लें. मरण आयिल्ल्या माकडांच्यो कुडी जळींमळीं पातळल्ल्यो. ही परिस्थिती पळोवन थळाव्यांनी तेन्नाचे गांवचे सरपंच आनी एका पशुवैजकी डॉक्टराक म्हायती दिली. ते घडणुके सुवातेर पावून तांणी जिवे आशिल्ल्या माकडांचेर उपचार केले.
थळाव्यांनी केल्ल्या आरोपा प्रमाण, अनवळखी मनशान माकडांक ढाब्याचेर हाडले आनी उपरांत तांकां मुद्दम विख दिलें. हे घडणुकेचो जनावरां मोगीनी खर निशेध केला. तेलंगणाच्या विवीध जिल्ह्यांत सुण्याचे सामुहीक हत्ये उपरांत ही घडणूक घडली. फाटल्या सप्तकांत कामारेड्डी आनी हनमकोंडा जिल्ह्यांत रस्ताद सुण्यांचे समस्येक आळो घालपाच्या पंचायत वेंचणूक वचनपूर्ती खातीर कथितपणान ५००सुण्यांक वीख दिवन मारिल्ले. आनीक एके घडणुकेंत याचाराम गावा लागसार सुमार १०० रस्ताद सुण्यांक वीखबाधा जावन तांकां मरण आयिल्लें. ह्या प्रकरणांत सरपंच आनी हेर दोगां आड तांच्या आसपावा खातीर गुन्यांव दाखल केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
