भांगरभूंय | प्रतिनिधी
हैदराबाद: तेलंगणाच्या हनमकोंडा जिल्ह्यांतल्या पथीपाका गांवांत २०० रस्ताद सुण्यांक मारून उडयले. पशुकल्याण कार्यकर्त्यांनी दिल्ले म्हायती प्रमाण डिसेंबरांत जाल्ले पंचायती वेंचणुके वेळार गांवच्या सरपंचान लोकांक सुण्यां पसून सुटका दिवपाचें उतर दिल्लें.
सुमार म्हयन्या आदीं सुण्यांक विखाचें इंजेक्शन दिवन हें उतर तांणी पुराय केल्लें. उपरांत सुण्यांच्यो कुडी गांवचे मसंडभुंयेंत पुरल्यो. हें सगळें ग्रामपंचायत सचीवाच्या देखरेखीखाला घडलें असो दावो केल्लो.
ह्यान पयलीं हनमकोंडा जिल्ह्यांतल्या श्याम्पेट आनी अरेपल्ली गांवांनी ६ जानेवारी ते ९ जानेवारी ह्या काळांत सुमार ३०० रस्ताद सुण्यांक मारपाच्यो घडणुको उजवाडाक आयिल्ल्यो. डिसेंबर २०२५ सावन तेलंगणाच्या तीन जिल्ह्यांनी वट्ट ११०० सुण्यांक मारून उडयल्यात.
२२ जानेवारी – जगतियालांत ३०० सुण्यांक मारले
२२ जानेवारीक जगतियाल जिल्ह्यांतल्या पेगाडापल्ली गांवांत सुमार ३०० सुण्यांक विख दिवन मारपाची घडणूक मुखार आयली. ह्या प्रकरणांत सरपंच आनी पंचायत सचीव हांचे आड बीएनएस आनी जनावरांचेर क्रूरपण प्रतिबंदक कायद्या खाला गुन्यांव नोंद जाल्लो.
१९ जानेवारी : याचरामांत शंबर सुण्यांक मारून उडयल्ल्याचो आरोप
१९ जानेवारीक याचराम गांवांत १०० सुण्यांक मारून उडयल्ल्याचो आरोप सरपंच, सचीव आनी एका वॉर्ड वांगड्या आड गुन्यांव नोंद जाल्लो. पुरपाच्या जाग्यार सुमार ७० ते ८० सुण्यांच्यो कुडी काडिल्ल्याचें पुलिसांनी सांगिल्लें. तीन चार दिसां आदीं कुडी पुरून दवरिल्ल्याचें समजता.
१४ जानेवारी : कामरेड्डींत २०० सुण्यांक मारले
१४ जानेवारीक कमरेड्डी जिल्ह्यांतल्या ५ गांवांनी – भवानीपेट, पलावंचा, फरीदपेट, वाडी आनी बांदरामेश्वरपल्ली हातूंत सुमार २००-३०० सुण्यांक सुण्यांक मरण आयिल्ल्याचो आरोप आसा. पुलिसांनी पांच सरपंचां सयत स जाणांचेर गुन्यांव नोंद केल्लो.
६-९ जानेवारी : हानमकोंडा जिल्ह्यांत ३०० सुण्यांक मरण आयलें
हानमकोंडा जिल्ह्यांतल्या श्याम्पेट आनी अरेपल्ली गांवांत ६ जानेवारी ते ९ जानेवारी ह्या काळांत सुमार ३०० रस्ताद सुण्यांक मारपाची घडणूक उजवाडाक आयिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
