भांगरभूंय | प्रतिनिधी
विख दिवन मारिल्ल्याचो दुबाव
हैदराबाद, खबरां संस्था ः तेलंगणाच्या सिद्दीपेट जिल्ह्यांतल्या एका गांवा भायर सुमार शंबर मेल्ले माकड मेळ्ळे. थळाव्यांनी ही गजाल पशुवैजकी खात्याक कळयली. तांच्या मरणाचें कारण सोदून काडपा खातीर अधिकाऱ्यांनी नमुने चांचणे खातीर धाडल्यात. माकडांक विख दिवन मारले आनी मागीर हांगा उडयले अशें थळावे लोक सांगतात.
40 माकडांक मारिल्ले
नोव्हेंबर 2020 वर्सा तेलंगणाच्या महबूबाबाद जिल्ह्यांत सुमार 40 माकडांक विख दिवन मारिल्ले. शनिगापुरम गांवां लागसार माकडांच्यो कुशिल्ल्यो कुडी मेळिल्ल्यो. ह्या प्रकरणांत अजून कांयच पुरावे मेळूंक नात. 6 ऑक्टोबराक उत्तरप्रदेशांतल्या 50 माकडांच्या कुडींचो व्हिडियो व्हायरल जाल्लो. कोणे तरी तांकां मारून रानांत उडयले. रान अधिकाऱ्यांनी समिती तयार करून चवकशेचो आदेश दिलो. तशेंच जिल्होधिकाऱ्यानूय तीन वांगड्यांची समिती स्थापन केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
