भांगरभूंय | प्रतिनिधी
पणजी : गोंय सरकारान लेखा खात्यांतली वरीश्ठ अधिकारी तेरेझा फर्नांडीस हांची लेखा संचालक म्हणून नियुक्ती केल्या. ही नियुक्ती गोंय लोकसेवा आयोगाच्या शिफारशी प्रमाण आनी गोंयच्या मुंबय उच्च न्यायालयाच्या आदेशा उपरांत केल्या.
१५ जुलयाच्या आदेशा प्रमाण, फर्नांडीस हांणी पदोन्नती १ ऑगस्ट २०२५ सावन लागू जातले. तांणी ह्यान पयलीं जोड संचालक म्हणून काम पळयलां, तांच्या कार्यकाळांतलो अणभव आनी वरिश्ठता लक्षांत घेवन तांकां हें पद दिलां.
ह्यान पयलीं दिलीप हुमरस्कर हांकां वरिश्ठता वळेरेंत सव्या क्रमांकाचेर आसूनय लेखा संचालकपदार नेमिल्ले. ते ३१ ऑगस्ट २०२४ दिसा सेवेंतल्यान निवृत्त जावपाचे आशिल्ले, तरी तांकां एका वर्साची मुजतवाड दिल्ली. हाचेर आक्षेप घेवन तेरेझा फर्नांडीस आनी राजेश महाले हांणी न्यायालयांत याचिका दाखल केली. महाले ३१ मे २०२५ दिसा सेवानिवृत्त जाले. उपरांत न्या. भारती डांगरे आनी न्या. निवेदिता मेहता हांच्या द्विसदस्यीय न्यायपीठान फर्नांडीस हांची ४ सप्तकां भितर लेखा संचालकपदार नेमणूक करपाचो आदेश दिला. उपरांत राज्य सरकारान गोंय लोकसेवा आयोगाचे शिफारशी प्रमाण तांची नियुक्ती केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
