भांगरभूंय | प्रतिनिधी
नियोजनबद्द पद्दतीन काम चलिल्ल्याचो लोकांचो आरोप
भांगरभूंय | प्रतिनिधी
पेडणें : तेरेखोल न्हंयेच्या पात्रांत बेकायदेशीर रेंव उसपप परतून नेटान सुरू जाल्ल्यान न्हंये देगेर आशिल्ल्या गांवांतल्या लोकांनी खर तिडक उक्तायल्या. दोन म्हयन्यां आदीं उगव्यां जाल्ल्या फारपेट प्रकरणा फाटल्यान रेंव वेवसाया वयल्यानूच वाद आशिल्ल्याचो दुबाव उक्तायल्लो. ह्या फारपेटांत दोन कामगार गंभीर जखमी जाल्ले. ह्या प्रकरणांत थळाव्या लोकांक अटकूय जाल्ली, मात हालींच तांची सुटका जाले उपरांत परतून एक फावट तेरेखोल न्हंयेत रेंव उसपप नेटान चालू जाल्ल्याचें चित्र दिसता.
न्हंयेच्या पात्रांत रातच्या काळखांत व्हडा प्रमाणांत व्हडीं देंवोवन रेंव उसपप चालू आसता, हो बेकायदेशीर वेवसाय नियोजनबद्ध पद्दतीन सुरू आशिल्ल्याचो आरोप थळाव्यां लोकांनी केला.
केरी वाठारांत तेरेखोल न्हंयेंत व्हडा प्रमाणांत बेकायदेशीरपणान रेंव उसपप चालूच आशिल्ल्याचें स्पश्टपणान दिसता. विशेश म्हणल्यार, दर्यादेग पुलिसांची चौकी फक्त एक किलोमिटर अंतराचेर आसा.
थळाव्या सुत्रांनी दिल्ले म्हायती प्रमाण, ह्या रेंव वेवसायांतल्या दरेका व्हड्या फाटल्यान म्हयन्याक सुमार 35 हजार रुपयांची वसुली करतात. उपरांत हे लाखांनी रुपया एकठांय करून ताचे वांटे घालतात आनी ते संबंदितांक पावयतात, अशी म्हायती सुत्रां कडल्यान मेळ्ळ्या. इतलेंच न्हय, जाल्यार कांय कर्मचारी, अधिकारी ह्या वेवसाययिकांचेर सेगीत पयशां खातीर चेंपण हाडटात अशी उक्ती चर्चा लोकां मदीं चालू आसा. रेंव उसपिल्ल्यान तेरेखोल न्हंयेदेगे वयल्या पुराय भागाक धोको निर्माण जाला. खूबश्या सुवातां वयल्या न्हंयेचो देगो मुंगरिल्ल्यान फुडाराक व्हड दुर्घटना जावपाची भिरांत न्हयकारपाक येना. बागायती, मळे, शेतां आनी शेत जमनींचें व्हडा प्रमाणांत लुकसाण जाल्ल्यान शेतकरी अर्थीक संकश्टांत सांपडल्यात. मुख्यमंत्री आनी थळाव्या आमदारान हातूंत लक्ष घालचें, अशी थळाव्या शेतकांरांनी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
