भांगरभूंय | प्रतिनिधी
पेडणें: गोंय मुक्त जावन 65 वर्सां जावन गेलीं. आतां पयलेच खेपे तेरेखोल गांवाक गोंयांतल्यान वीज पुरवण जातली. वीज पुरवणेचें उक्तावण 2 जुलयाक सांजे वेळार थळावे आमदार जीत आरोलकार हांचे हस्तुकीं जातलें.
गोंय मुक्ती उपरांत लेगीत तेरेखोल गांवा खातीर महाराष्ट्र सिंधुदुरग वाठारांतल्यान वीज पुरवण जाताली. केरी आनी तेरेखोल हांचे मदल्यान तेरेखोल न्हंय व्हांवता. तेरेखोल गांव पलतडी आनी केरी गांव आलतडी पडटालो. हे न्हंयेचेर पूल नाशिल्ल्यान उदका पोंदच्यान वीज कॅबल व्हरपाक खूब आडखळी येताल्यो. ताका लागून महाराष्ट्रांतल्यान ह्या गांवाक वीज पुरवण करताले. 2021त गोंयच्या तेन्नाच्या लोकप्रतिनिधींनी सरकार दरबारांत यतेन करून तेरेखोल गांवा खातीर भुंयगत उदका पोंदच्यान वीज कॅबल घालून वीज पुरवण करपाची येवजण आंखिल्ली. ते खातीर 4 कोटी 44 लाखां परस चड खर्च केल्लो आनी तें काम लेगीत पुराय जालां. तेरेखोल गांवा खातीर वीज पुरवण गोंयांतल्यान जावची हे खातीर थळावे आमदार जीत आरोलकार हांणी सरकार दरबारांत यत्न केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
