भांगरभूंय | प्रतिनिधी
फाटल्या सप्तकांत आरंभ जाल्लें नवें शिक्षणीक वर्स बरीच उमळशीक घेवन आयलां. शिक्षणीक पुनर्रचनेचें हें वर्स गोंयच्या शिक्षणीक मळार भोवच म्हत्वाचें आनी फुडाराच्या बदलांक दिका दिवपी आसतलें. ताचें कारण म्हणल्यार ह्या वर्साच्यान राष्ट्रीय शिक्षणीक धोरण चालीक लागतलें म्हणपाचें गोंयचे मुख्यमंत्री डॉ. प्रमोद सावंत सातत्यान सांगत आसात. गोंय प्रशासनांतले धडाडीचे आनी कार्यक्षम सनदी अधिकारी प्रसादबाब लोलयेकार हांची शिक्षण सचीव म्हूण नेमणूक जाल्ल्यान शासन धोरणाच्या अंमलबजावणे विशीं खऱ्यांनीच गंभीर आसा म्हणपाची देख मेळटा. प्रसादबाब हांणी गोंयच्या शिक्षणीक मळार सक्रीय आशिल्ल्या विंगड विंगड घटकांक सांगाता घेवन धोरणाच्या अंमलबजावणेक नेटान आरंभ केला. शिक्षणीक मळावेल्या अणभवी, तळमळी आनी कार्यकुशळ वावुरप्यांक पयलेच खेपे शिक्षणीक मळाचेर कितें तरी नवें आनी वेगळें घडटा म्हणपाची जाणीव जावंक लागल्या. एक सकारात्मक उर्जा शिक्षणाच्या मळार तयार जावन उमळशीक, अपेक्षा आनी हावेसांचें ओजें घेवन शिक्षण खातें तशेंच राज्य शिक्षणीक संशोधन आनी प्रशिक्षण संस्था वावरूंक लागल्या.
शिक्षणा सारख्या मळार नवें धोरण चालीक लागता तेन्ना आरंभाचो चार- पांच वर्सांचो काळ भोव म्हत्वाचो आसता. नवें धोरण ताच्या उद्दिश्ठां सयत समजून घेवप, तें चालीक लावपाचे नदरेन आपल्यो क्षमतायो आनी वांगडाच आपलीं दुबळेपणां जाणून घेवप भोव गरजेचें थारता. स्थित्यंतराच्या ह्या काळांत सबंदीत सगल्या घटकांक धोरणांतल्या उपलब्धतेची जाणीव आसप गरजेचें आसता.
नव्या शिक्षणीक धोरणांतल्या पुनर्रचनेंत तीन ते आठ वर्सांचो काळ हो आरंभाचो बुनयादी शिक्षण पांवडो म्हूण मानला. ह्याच काळांत भुरग्याच्या मेंदवाचो विकास चड नेटान घडटा, अशें संशोधन सांगता. आनी देखूनच ह्या काळांतलें शिक्षण हें भुरग्याचेर कसलेंच चेंपण घालीनास्तना आनंददायी जावचें आनी ताच्या जिविताची सक्षम अशी बुनयाद घडची अशी रचना नव्या शिक्षण धोरणांत केल्या. हें साध्य करपा खातीरचीं शिक्षणाचीं ध्येयां, अभ्यासक्रमाचीं उद्दिश्ठां, भुरग्यां मदीं तयार करपाच्यो क्षमतायो आनी अध्ययन निश्पत्ती भोवच प्रभावी आनी साद्या- सोंप्या तरेन बुनयादी पांवड्या वेल्या राष्ट्रीय अभ्यासक्रम चौकटींत सांगल्यात. बुनयादी पांवड्याचेर साक्षरताय आनी गणिती क्षमतायांचेर खाशेलो भर दिला. भुरग्याचें बुनयादी शिक्षण ताच्या आवयभाशेंतल्यान वा घरांतल्या वा सवंकळीच्या भाशेंत जावचें अशें धोरणांत सांगलां. हाचोच अर्थ गोंयच्या अंदाजान उण्याच णव्वद टक्के भुरग्यांचें शिक्षण कोंकणी भाशेंत जावचें पडटलें. राजकीय फायद्या- लुकसाणेचो विचार करिनास्तना भाशा माध्यमाचो विचार सरकाराक करचोच पडटलो.
बुनयादी पांवड्या वेल्या शिक्षणीक संस्थांचेर आयजवेर शासनाचो कसलोच शेक नाशिल्लो. कांय कडेन अक्षरशा पसऱ्यांनी लेगीत पूर्व प्राथमीक शाळा चलतात. लाखांनी रुपया फी भरून पालक आपल्या भुरग्यांक त्या शाळांनी धाडटात. बालशिक्षण शास्त्र वा तांतूंतल्या आधुनीक बदलांचो कसलोच अभ्यास अश्या संस्था चालकां कडेन कडेन वा शाळांतल्या शिक्षकां कडेन ना. भोवतेक शाळांनी शिक्षकां कडेन बुनयादी पांवड्यार शिकोवपाचें कसलेंच शास्त्रीय प्रशिक्षण ना म्हणपाचें दिसून येतलें. भुरग्यांक तीन- चार वर्सांच्या ल्हान पिरायेचेर बरोवंक वा वाचूंक कळप म्हणल्यार तीं शिकप अशे तरेची समजूत शिक्षकांनी केल्या. गरजेच्या अध्ययना खातीर आपल्या भुरग्यांच्या ज्ञानेंद्रियांची पुरायपणान वाड जाल्या काय ना हें पळोवपाचें पालकांकय भान नासता. हातूंत बळी वता तो भुरग्याचो हें कोणच लक्षांत घेना.
आतां नव्या धोरणाक धरून खेळ आनी उपक्रमां वरवीं अध्ययन ही संकल्पना शिक्षकांक आपणावचीच पडटली. चोपड्यो, पाठ्यपुस्तकां हांची सुवात भुरग्यांच्या मेंदवाक आनी ते वरवीं तांच्या शारिरीक आनी ज्ञानात्मक वाडीक चालना दिवपी खेळ आनी क्रियात्मक उपक्रमांक दिवची पडटली. परिक्षा, तिका धरून निकाल, क्रमांक ह्यो पारंपारिक आनी पालकांच्यो भोव आवडीच्यो गजाली आतां काळाभायऱ्यो जातल्यो. भुरग्यांचें मुल्यमापन उपचारीक परिक्षे वरवीं न्हय तर सातत्यान केल्ल्या सर्वंकश निरिक्षणांतल्यान जातलें.
भुरगो शाळेंत आपले आवयभाशेंतल्यान वा घरच्या भाशेंतल्यान काणयो, खेळ, गितां, नाट्य, हस्तकला, कुवाडीं, पंगडांनी करपाचे उपक्रम आदी माध्यमांतल्यान शिकतलो अशे तरेची येवजण बुनयादी पांवड्यावेले अभ्यासक्रम चौकटींत भोव प्रभावीपणान मांडल्या. शिक्षकांक अश्या स्वरुपांतल्या अध्यापनशास्त्राक आपणावचेंच पडटलें. तेचपरी पालकांक तें मानून घेवचें पडटलें.
बुनयादी पांवड्यार भुरग्याच्या पुराय वाडीक तैत्तिरीयोपनिषदांत मांडिल्ल्या पंचकोश विकासाची संकल्पना ह्या धोरणांत मांडल्या. हे संकल्पनेक अस्तंती देशांनी शिक्षणाच्या बुनयादी पांवड्यार केल्ल्या कांय प्रयोगांची जोड दिल्या. शिक्षण म्हणल्यार फकत पुस्तकां, चोपड्यो, होमवर्क, वर्गांत पुराय वेळ शिक्षकांची बडबड, परिक्षा आनी निकाल हे पलतडीं वचून बालमानसशास्त्राक पोसवण दिवपी अभ्यासक्रम, उपक्रम हांची आमकां सवंय करचीच पडटली. भुरग्याक अध्ययनाक जितलें सैमीक आनी सहज वातावरण मेळटलें तितले सोपेपणीं तो अपेक्षीत ध्येय साकारपाक पावतलो.
आतां मेरेन भोवतेक मुळाव्या शाळांत विद्यार्थ्यांनी उपाट भरिल्ले अध्ययनाक पोशक नाशिल्ले वर्ग, अध्यापनशास्त्राचो कसलोच अभ्यास नाशिल्ले शिक्षक, बेगीनात बेगीन आपलो भुरगो सर्वज्ञानी जावंक जाय म्हूण तळमळपी पालक अशें चित्र आमकां सरसकट दिसतालें. नव्या बदलांक धरून शाळांतली नवी अध्यापन पद्दती शिक्षक आनी पालकांनी आपणावची पडटली. ‘हाताची घडी आनी तोंडार बोट’ हे सुवातेर भुरग्यांच्या संवाद कौशल्यांक वाव दिवपी आनी ताच्या सगल्या ज्ञानेद्रियांच्या विकासाक पोशक उपक्रमांची प्रभावीपणान मांडणी शिक्षकांक करची पडटली. शाळा ह्यो भुरग्यांच्या कुलकुलाटान भरिल्ल्यो आनंददायी सुवाती जावच्यो पडटल्यो. ते खातीर गरजेची शिक्षक नियुक्ती, तांचें सातत्यान प्रशिक्षण, साधनसुविधांची पुरवण, उक्त्या- मेकळ्या- हवेशीर वर्गांची निर्मणी संस्था चालकांक करची पडटली. शाळांचें सेगीत मुल्यांकन जावचें पडटलें.
शिक्षणा कडेन संबंदीत सगले घटक एकठांय येवन ह्या म्हायज्ञांत आपल्यो समिधा घालतले तेन्नाच धोरणाची फलनिश्पत्ती घडपाक पावतली.
अनंत अग्नी
9422439903
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
