भांगरभूंय | प्रतिनिधी
आमची समाजीक बांदिलकी उक्तावपाचो आनी आमच्या वायट वृत्ती, प्रवृत्तींचेर जैत जोडपाचो संकल्प केल्यार नव्या वर्साची खोस दुपेटीन वाडटली. आमकांच न्हय, तर हेरांकूय ताचो फायदो जातलो.
नवें वर्स सोंपपाक पावलां. देशभरांतले बऱ्याच तरणाट्यां मदीं 31 डिसेंबराचे रातीं सोरो पियेवन नव्या वर्साक येवकार दिवपाची प्रवृत्ती आसता. नव्या वर्साच्या आदले दिसा तरणाटे पब वा क्लबांत पार्टी करपाक वतात मागीर पिवन गाडी चलोवप, व्हडलो आवाज जावंक जाय म्हूण दुचाकीचो सायलन्सर काडप, माराणे मारप, डीजे वा लावडस्पीकराच्या कान फोडपी आवाजाचेर नाच करप अशीं कामां करतात. अंदूं हो आंकडो खूब वाडपाचो आसा. कारण सरकारान पब, क्लब, रेस्टॉरंट रातभर उक्तीं उरपाक परवानगी दिल्या. गोंयांत तीं उक्तीं आसतात. मात महाराष्ट्रा सारक्या राज्यातूंय तीं रातभर उक्तीं आसतलीं. सोरो पियेवन कसली मजा येता तेंच कळना. दुख्ख विसरपाक जाता अशें म्हणटात, तें फट. सोऱ्यान भलायकी मात स म्हयन्यां भितर इबाडटा.
पब, क्लब, रेस्टॉरंट रातभर उक्ते उरतले, म्हणटक तरणाट्यांनी पयलींच पार्टीची तयारी केल्या आसतली. अशे तरेन नव्या वर्साक येवकार दिवप म्हणल्यार कायदो आनी सुवेवस्था मोडप, पूण हें जाणून लेगीत अशीं कामां बरेच लोक करतात. हालींच्या काळांत ह्यो गजाली खूब वाडल्यात. सोरो पियेवन नव्या वर्साक येवकार दिवप ही एक फॅशन जाल्या. नव्या वर्साच्या आदल्या दिसा सोरो पियेवप गरजेचें असो निश्कर्श तरणाट्यांनी काडला. सोरो पियेनासतना नव्या वर्साक येवकार दिवंक मेळटा अशें तांकां दिसना, देखूनच ते हें करतात, अशें म्हणचें पडटा. सोऱ्याचे वायट परिणाम जाणून लेगीत ह्यो गजाली ते करतात. मागीर नशेंत वेगान गाडयो चलयतात. तोल गेलो जाल्यार मागीर अपघात जातात. ह्या अपघातांत कांय जाणांक मरण येता, कांय जाण जखमी जातात आनी कांय जाण कायमचे दिव्यांग जाल्यात. गोंयांत वर्साक कितले अपघात जातात आनी कितले लोक, खास करून तरणाटे मरतात, तें हांवें सांगपाची गरज ना. प्रत्येक वाड्यार अपघातांत एकलो तरी जखमी जाल्लो वा मरण आयिल्लो मनीस आसतलो.
सोरो पियेवन गाडी चलोवन गेल्ल्या अपघातांत कुटुंबाचें पोट भरपी जोडकार मनीस मरता. मागीर कुटुंब रस्त्यार येता. अर्थीक नदरेन तांचे हाल जातात. सोरो पियेवन गाडी चलोवप म्हणल्यार स्वताचो आनी दुसऱ्याचो जीव धोक्यांत घालप, देखून नव्या वर्साक येवकार दितना स्वताक आनी दुसऱ्यांक त्रास जावचो ना हाची जाणविकाय दरेकल्याक आसूंक जाय. पोरण्या वर्साक निरोप दितना आनी नव्या वर्साक येवकार दितना कोणाक त्रास, लुकसाण जावचें ना, हाची सगळ्यांनीच जतनाय घेवची.
नव्या वर्साक येवकार दिवप म्हणल्यार बऱ्या- वायट गजालीं पासून पयस रावप, नवे निश्चेव करप, बऱ्यो संवयी आपणावप, ताचें निश्चीत धोरण थारावप, सत्याक घट धरून रावप आनी नव्या जोश, उमेदीन काम सुरू करप. देखून नव्या वर्साक येवकार दितना सगळ्यांनी अस्तंतेचें कुड्डें अनुकरण करप बंद करचें आनी बरे कर्तुब करपाचो संकल्प करचो.
आयज संवसारांतली अन्नधान्याची पुरवण संकश्टांत आसा. सैमिक आनी चुकीच्या धोरणांक लागून शेतकार आत्महत्या करपाक लागल्यात. म्हारगायेन सगलेच लोक बेजारल्यात. आतंकवादी आनी नक्सलींच्या हल्ल्यांत देशाचे तारणहार जवान शहीद जावपाक लागल्यात. नव्या वर्साक पिशें जावन येवकार दिवचे परस आमी आत्महत्या केल्ल्या शेतकारांच्या भुरग्यांक, शहीद सैनिकांच्या भुरग्यांक, अनाथ भुरग्यांक मजत करून नव्या वर्साक येवकार दिवंक शकतात. अर्थीक नदरेन गरीब कुटुंबांक अर्थीक मजत दिवन आनी तांच्या भुरग्यांची शिक्षणीक राखण स्विकारून, गरीब भुरग्यांक शिक्षणीक साहित्य वांटून, जाण्टेपणांतल्या घरांक आनी अनाथालयांक अर्थीक मजत दिवन आमी नवें वर्स मनोवंक शकतात. बरेच फुडारी फक्त आपल्या मतदारसंघा पुरते मजत दितात. खरें म्हणल्यार तांणी सगल्या जिल्हो, राज्याचो विचार करपाक जाय.
रगतदान हें सगळ्यांत बरें दान. रगतदान करून नव्या वर्साची सुरवात केल्यार दुयेंतीचो जीव वाटावपाचें समाधान आमकां मेळूंक शकता. नव्या वर्सा अवयव दान करपाचोय आमी संकल्प करूं येता. आयज समाजांतल्या बऱ्याच लोकांक रक्त, अवयवाची गरज आसा. सोदूनय ते मेळनात. ताका लागून तांकां जीव वगडावचो पडटा. प्रत्येकान अवयव दानाची तयारी दवरल्यार दुयेंतींक तें बऱ्याक पडटले. हालींच गोंयांत एकल्याक काळजाचें दान केल्ल्यान ताचो जीव वाटावलो. आमच्या देशांत जितले अपघात जातात, त्या सगल्यांचे दोळे दान करपाचो संकल्प करीत जाल्यार आमचो देश दिश्टीहीन उरचो ना. प्रत्येकान रगतदानूय करपाक जाय. रगत कांय वेळा आशिल्लें तितलें तयार जाता. तेन्ना रगतदान करपाक कोणे भिवपाक जायना.
ल्हान ल्हान संकल्प केल्यार फुडाराक आमकांच तांचो व्हड फायदो जावंक शकता, देखून आमचें जिवीत आनी आमच्या प्रिय व्यक्तींचें जिवीत चड गिरेस्त आनी अर्थपूर्ण जावंक शकता. जुने मरून वचून, लासून वा पुरून उडयात, अशी एक कविता आसा. तिच्या ओळीं प्रमाण फाटल्या वर्साचीं सगळीं बरीं वायट भावना पुसून नव्या वर्साक येवकार दिवंक जाय. आमची समाजीक बांदिलकी उक्तावपाचो आनी आमच्या वायट वृत्ती, प्रवृत्तींचेर जैत जोडपाचो संकल्प केल्यार नव्या वर्साची खोस दुपेटीन वाडटली. आमकांच न्हय, तर हेरांकूय ताचो फायदो जातलो. तेन्ना विचार करूंया. नवें वर्स मनोवपाक घरा भायर वचपाकूच जाय अशें ना. रातचे घरांत बसून बरें पुश्टीक कितें तरी खालें, पियेले, सिनेमा वा मनरिजवणीची एखादी कार्यावळ पळयली जाल्यार खोस मेळटा. सोरो, चिकनूच कित्याक खांवक जाय.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
