तेन्नाचीं लग्नां आनी केळवण

भांगरभूंय | प्रतिनिधी

अहेराचें चवथें चकचकीत रूप म्हळ्यार लाखाटो. त्या काळांत पयसो हें प्रकरण तशें उणें घोळणुकेंतलें. पयशे घालचेच पडले जाल्यार एक नोट गुलाबाचें फूल बी आशिल्ल्या गुलाबी खाशेल्या लाखाट्यांत कोंबप आनी दिवप.

भुरगेपणांत गाडी घोडे, स्कूटर, बशी खूब कमी आशिल्ल्यो. 1979 च्या दशकाचो काळ. हांव प्रियोळा आजोळा शिकतालों. लायट नाशिल्ली. वाड्यार कोणालेंय लग्न आसतकच बस येताली. बस कितल्यांक सुट्टली तें कार्डाचेरूच छापताले. अमूक सुवाते वयल्यान बस अमूक वेळार सुट्टली अशी नोंद कार्डार आसताली. व्हंकलेच्या नांवा फाटल्यान चि.सौ.कां. अशी उपाधी आसताली. कां. म्हळ्यार कितें हें म्हाका समजुपाक बरोच वेळ लागलो. शके म्हळ्यार कितें हेंवूय कळपाक वर्सां गेलीं. आसूं.
वाड्यार बस येना फुडें भुरग्यांच्यो घे कुयो, बोबो. सगळीं धांवत वचून जनेला कडल्या सिटार बसपाक झुजतालीं. वाड्यार येदी व्हडली बस पयलेच खेपे हो आनंद भुरग्यांक सोसूं नजो जातालो. सोसायटीच्यो निळ्यो आनी तांबड्यो बशी म्हाड्डोळ बाजारांतल्यान पणजी फोंडें आनी मडगांव मेरेन धांवताल्यो. लग्नांक वचपाच्यो बशी निवळ आसपाक जाय. ह्या कारणान खाजगी बशी चक्क धुवन निवळ करून हाडटाले. फेशल बस आयली अश्यो हुयेली आयकूंक येताल्यो. हालींसराक तोंडाक लेपोड सारोवपाचें जें फेशल आयलां, तें प्रकरण त्या काळांत नाशिल्लें. फेशल बसींतल्यान प्रवास करप म्हळ्यार आकांताची खोस. भुरग्यांक चड. गांवांतले लग्नाक वचपी लोक थोड्या प्रमाणांत आसल्यार पिकप करून वताले. त्या काळांत पिकप हें भोवउद्देशीय वाहन आशिल्लें. सामानाचो, माल येरादारीचो टेम्पो म्हळ्यार पिकप. पूण लग्नाक धरून रातचो पयस नाटकाक, सिनेमाक, संगीत कार्यावळीक बी पिकपीन वताले. ती कल्पना केल्यार हांसूंक येता. आतांच्या भुरग्यांक सांगल्यार पटचेंच ना तें. म्हाड्डोळा लग्न आशिल्लें एका इश्टाचें. सावय वेरेंचे म्हजे इश्ट बाजारांत पिकपीची वाट पळेत रावले. वरभर वाजेवन वाट पळेली. पिकपीचो पत्तो ना. एकदांची पिकअप येवन उबी जाली.
लग्नाक वचपी लोक वाजेल्ले. तिडकल्ले. तांणी पिकपवाल्याक ताणशेवन भायरी दिली. म्हूर्त चुकलो मरे… कितें हें… पिकपवालो वेवसायांत गिरायकांक हाताळपाक अणभवी आशिल्ल्यान ताणें समजावन सांगलें. आपणाक दनपारां अकस्मात आनीक एक भाडें मेळ्ळें. कसलें तें आयकात. कुळागरांत व्हरून शेण घालप. उपरांत परत परत पिकअप धुवन निवळ करपाक वेळ लागलो. त्या काळांत वाहनाचेर उदकाचो फवारो मारपाचीं विशेश मशिनां, पायपां नाशिल्लीं. म्हजे इश्ट नवे कपडे घालून त्या शेणमय पिकपींत चडले. केरी व्हॉल्तांचेर ब्रेक मारतकच पिकपीच्या बरगड्यांक घॉ करून आदळप. कपड्यांची आवतिकाय आनी दैना.
आमी म्हाळसा संस्थाना लागसार लग्न, फराळ करून भायर येताले. इतल्यान आंबट तोंडां करून हे इश्ट भायर मेळ्ळे. तांची काणी आनी वेदना आयकून हांसूंक येतालें. ते तानेल्ले भुकेल्ले. दूद ‘कॉर्डिंग’ उरलां काय ना हाची चवकशी करपाक इश्ट मुखार वचपाक लागले.
त्या काळांत दूद कोल्ड ड्रींक अशें कोण म्हणच नासलो. दूद कोर्डींग. बुफे, बुके हीं विदेशांतलीं प्रकरणां गोंयांत तरी पावंक नाशिल्लीं. सगळें सादें. भपको, बडेजाव, बडवाचार, मोटेपणा ना. सगळें कशें सादें. अडेचें कांयच नासतालें. नो प्रेझेंट्स प्लीज, हेंवूय वाक्य पत्रिकेचेर नासतालें.
त्या काळांत तीन नग मोट्या प्रमाणांत केळवण वा अहेर वा आवेर म्हूण पॅक करून दिताले. गुलाबी पातळ फुलांफुलांची फोल पापेलांवांच्या काशीक रेवडावप. तातूंत घालप मिल्क कूकर वा लेमन सेट वा धातूचो उदकाचो जग जाका कावळो म्हणटाले. कारण ताका उदक ओतोवपाचे सुवातेर कावळ्या सारकी चोंच आसताली.
त्या काळांत बाजारांत लिंबू तशे नासतालेच. आयलेय जाल्यार सरबता सारके थाट करप कोणाक परवडपा सारके नाशिल्ले. लेमन सेटांतल्या ग्लासांतलो फायदो नासलोच. लेमन सेट हें उतर आयचे पिळगेच्या कोशांत ना. पूण आमकां यादिनूच हांसपाक येता.
न्हवऱ्या व्हंकलेक गिफ्ट म्हणून राशींनी लेमन सेट, मिल्क कूकर आनी कावळे येताले. लेमन सेट खुबूच. तातूंत स ग्लास आसताले. हें गिफ्ट हेरां परस सवाय. राशींनी लेमन सेट, मिल्क कूकर हांचो वापर वा विलो कसो लावप हो तकलीफोडीचो प्रस्न नाशिल्लो. कारण लेमन सेटा वयलें लेबल काडून दुसरी फोल गुटलावन आनिकूय कोणाच्या लग्नाक अहेर दिवप जातालें. तें गिफ्ट घेवपी परत आनीक कोणाकूय तें दान करून उडयतालो. हीं चक्राकार आवर्तनां अखंडपणान चालू उरतालीं.
कूकर, कावळे हे धातूचे आशिल्ल्यान दिवपी आपलें नांव ताचेर कोंरांततालो. तें प्रकरण दुसऱ्यांक दिवन कशें लाटावप? लापीट लोक ताचेरूय उपाय काडटाले. आयदनकारांच्या दुकानांचेर व्हरून टर्र टर्र आवाज करीत तें आदलें नांव, मजकूर खोडून उडयताले. खोडपाचें काम केलां हें कळचें न्हय म्हूण थंय फूल वा मोर बी टरटरावन कोरांतप आनी कुशीक आपलें नांव घालप आनी तो कूकर लाटावन घालप अशी हुशारी कांय जाण लडयताले.
अहेराचें चवथें चकचकीत रूप म्हळ्यार लाखाटो. त्या काळांत पयसो हें प्रकरण तशें उणें घोळणुकेंतलें. पयशे घालचेच पडले जाल्यार एक नोट गुलाबाचें फूल बी आशिल्ल्या गुलाबी खाशेल्या लाखाट्यांत कोंबप आनी दिवप.
इश्टांनो, ते दीस खऱ्यांनीच अभिमंत्रीत केल्ले वरी आशिल्ले. टिश्यू पेपर, मिनरल वॉटर, केटरर्स, नवरतन खुर्मा, पनीर मसाला…. हीं प्रकरणां गोंयांत पावलीं आनी तीं सादेपणां गायब जालीं. कृत्रीम अडे बाटगे तयार जाले. त्या काळांतली ती सादी सादी पिक-अप पयस पयस गेली… फाटल्यान सुंदर, गोड यादींचो दरवळ मनांत दवरून.

मुकेश थळी
फोंडे