भांगरभूंय | प्रतिनिधी
बिहारांत फुडल्या दोन अडेज म्हयन्यांत जायत आशिल्ल्या विधानसभा वेंचणुकेचे फाटभुंयेर थंयचें राजकी वातावरण खूबशें खवदळ घालीत आसा. लोकसभेंतले विरोधी पक्ष फुडारी राहुल गांधी हांच्या फुडारपणा खाला राष्ट्रीय जनता दलाचे तेजस्वी यादव हांच्या पालवान जी मताधिकार यात्रा सुरू आसा तातूंतल्यान नेमके कितें साद्य जातलें हो मोटो प्रस्न आसा. स्वता तेजस्वी यादव हे बिहारचें मुख्यमंत्रीपद आपल्याकूच मेळटलें ह्याच नेटान ते यात्रेंत वावरत आसात आनी त्याच नेटांतल्यान तांणी राहुल गांधी हांकां देशाचें प्रधानमंत्रीपदूय दिवपाची घोशणा करून उडयली. हांगाच ते राविल्ले जाल्यार घडये फुडलें रामायण घडूंक पावचें नाशिल्लें. ‘देशका पीएम कैसा हो, राहुल गांधी जैसा हो’ अशी घोशणाय तांणी दिली आनी इंडी आघाडेंतल्या हेर कांय पक्षांच्या फुडाऱ्यांच्या उस्तुऱ्यां तें गेलें. तेजस्वी यादवाचें दुर्दैव अशें की राहुल गांधी हांचे कडल्यान तांकां ज्या प्रतिसादाची अपेक्षा आशिल्ली तशें कांयच घडलें ना आनी ते अक्षरशा तोंड घेवन पडिल्ले भशेन जालें. ‘राहुल एके राहुल’ होच पाडो पुराय यात्रेंत तेजस्वी यादव म्हणत रावलो. पूण राहुल गांधी हांणी पयलेच फावटी अशें शाणपण दाखयलें की ते त्या जाळ्यांत आडकले नात की जेणे करून तांच्या फुडल्या अडचणींनी आनीक भर पडपाची. राहुल गांधी हांचें प्रधानमंत्रीपद आसूं वा तेजस्वीचें मुख्यमंत्रीपद. हे दोन अशे विशय आसात की विरोधी ‘इंडी’ आघाडी ताचेर मतैक्य जावपाची मात लेगीत शक्यताय नासतना मताधिकार यात्रे वेळार ताचेर कोणूय अधिकारान उलोवप म्हणल्यार मूळ मुद्दो कुशीक दवरून भलतीच कडेन भरकटपाचो हो प्रकार आसा.
राहुल गांधी हांकां अर्थांतच मतचोरीच्या नांवा खाला देशांत सगली कडेन असो भ्रम पातळावपाचो आसा की व्हड प्रमाणांत मतचोरी जायत आशिल्ल्यानूच भारतीय जनता पार्टीक सगले कडेन येस मेळत आसा. हो विशय वेंचणूक आयोगान उक्तडार हाडून लेगीत राहुल गांधी हांचें तुणतुणें चालूच आसा. उरफाटें बिहारांत आनीक उत्साहान तांणी तेजस्वी यादव हांचे सयत मतदार अधिकार यात्रा सुरू केली. ताचो कितलो मेरेन लाव काँग्रेसीक आनी तांच्या इश्ट पक्षांक मेळटलो हो दुबावूच आसा. राहुल गांधी हांची ही पयलीच यात्रा न्हय. हाचे आदींय तांणी काडिल्ल्या यात्रांचो वेंचणुकेंत कसो धुंवर जालो हाची जाण सगल्यांकूच आसा. ताका लागून लालूपूत तेजस्वी यादव सोडल्यार ‘इंडी’चे हेर घटक पक्ष हे यात्रेंत तांचे बराबर क्वचितूच दिसतात. आतां तेजस्वी यादवा खातीर येता ती विधानसभा वेंचणूक म्हणल्यार तांच्या राजकी अस्तित्वाचो प्रस्न आशिल्ल्यान सगले डावपेच लडयत ते राहुला बराबर रस्त्यार देंवल्यात. राहुल गांधीक प्रधानमंत्री करपाचें आस्वासन दितना आपली राजकी पोळी भाजून घेवपा खातीर तेजस्वी यादव हांणी सगलें कितें केलें, कांयच शिल्लक अशें दवरिल्लें ना. राहुल एके राहुलाचो पाडो सगली कडेन म्हणत तांच्या तोंडांतल्यान आपूण बिहारच्या मुख्यमंत्रीपदाचो कसो दावेदार आसा हेंच जाहीर जावप तांकां अपेक्षीत आशिल्लें. पूण राहुल गांधीन मात शाणपणां केलीं. पत्रकारांनी खोदून खोदून ह्या विशयाचेर विचारले उपरांतूय राहुल गांधी हांणी तेजस्वी यादव हांचें नांव घेवपाचें टाळ्ळें. पूण इंडी आघाडी योग्य दिशेन चल्ल्या अशें सांगपाक ते विसरले नात.
बिहारांत हे ‘दो लडके’ सद्या खवदळ घालीत आसात हें जरी खरें आसलें तरी मतदार वळेरेंतल्यान मतदारांचीं नांवां गाळीत आसात ह्या तांच्या आरोपांची सत्यताय पटोवपा खातीर जे पुरावे सादर करप गरजेचें आशिल्लें त्या आघाडीचेर ते कांयच करूंक शकले नात. तेजस्वी यादव हांचो हे यात्रे खातीर अजेंडा सद्या तरी वेगळोच दिसता. राष्ट्रीय जनता दलाचे कार्यकर्ते काँग्रेसीचो बावटो घेवन राहुल गांधी हांचे बराबरीन यात्रेंत वांटेकार जायत आशिल्ल्याचें वेगळेंच चित्र थंय दिसता. बिहारांत राजद आनी काँग्रेस हांचो जनाधार तसो सामको उणोच आसा. अशे परिस्थितींत सत्ताधारी आघाडी कडेन सर्त करतना लोकां मदीं फक्त भ्रम पातळायिल्ल्यान कितेंय हाताक लागत अशा भ्रमांत राहुल गांधी आनी तेजस्वी यादव हे दोगूय जाण रममाण जावन मुखार वचत आसात जाल्यार तांकां निरशेणीच येवपाची चड शक्यताय आसा. राहुल गांधी हांचे कडेन इंडी आघाडीत प्रधानमंत्रीपदाचो उमेदवार म्हूण कोणूच पळयना. स्वता काँग्रेस पक्षांतूय राहुल गांधीचेर एकमत आसा काय ना हो दुबाव आसा. पूण तेजस्वी यादव हांकां मात तांचे मदीं देशाचो प्रधानमंत्रीपदाचो चेरो स्पश्ट दिसता. आतां तो कित्याक दिसूंक लागलो हेंवूय स्पश्ट आसा. बिहारच्या मुख्यमंत्रीपदाचो चेरो आपूणच आशिल्ल्याचें राहुल गांधी हांच्या मनार बिंबोवपा खातीरच तेजस्वी यादव हांणी तो बाण सोडिल्लो पूण तो फुकट गेलो.
तेजस्वी यादव हांच्या मुख्यमंत्रीपदाच्या दावेदारीचेर काँग्रेस पक्षाच्या हेर फुडाऱ्यांनीय मोनेपणाचें व्रत घेतलां. हातूंतल्यान विरोधी आघाडीत आशिल्ले मतभेद उक्तडार येतात. आपल्या दाव्यार आघाडीत सहमती घडोवन हाडपाची तेजस्वीचो डाव येसस्वी जावंक शकलो ना हाचें एक कारण अशेंय आसूंक शकता आनी तें म्हणल्यार, तांणी खंयच्याच घटक पक्षाच्या फुडाऱ्यां कडेन चर्चा करिनासतना राहुल गांधी हांकां देशाच्या प्रधानमंत्र्याच्या कदेलार बसोवपाचें धाडस केलें. राहुल गांधी हे तर वेंचणूक आयोगाक मतचोर थारावपाक तांणी जी ताकतीक केली ताका लागून ते कोंयडेंत सांपडल्यात. सीएसडीएस म्हणल्यार ‘सेंटर फॉर द स्टडी आनी डेव्हलपींग सोसायटी’चे प्रो. संजय कुमार हांणी खंय तरी बरयिल्ल्या एका लेखाचो आदार घेवन राहुल गांधी हांणी वेंचणूक आयोगाक मतचोर थारावपाची जी ताकतीक केली ती तांकां बरीच म्हारग पडली अशीं चिन्नां सद्या तरी दिसून येतात. संजय कुमार हांणी आपली चूक मान्य करून आयोगाची माफीय मागली. अशे परिस्थितींत राहुल गांधी हांचीच ‘री’ ओडीत वेंचणूक आयोगा आड आवाज काडपी फुडाऱ्यांचीय कुचंबणा जाल्या. राहुल गांधी हांणी प्रतिज्ञापत्र दीत जाल्यार ते पुरायपणान कायद्याचे फास्केंत सांपडूंक शकतात. ताका लागून विरोधकांचो फुडलो मार्ग आनीक कठीण जावये. बिहारांत बांगलादेश- नेपाळच्या शिमे वेले मुस्लीमबहुल मतदारसंघांतल्यान मुखेलपणान यात्रा व्हरपाचो इरादोय स्पश्ट दिसून येता. घुसखोरांक मतदार वळेरेंत मेळिल्ली सुवात कायम उरतली अशी आस्त बाळगुपा सारकी आतां परिस्थिती ना. वेंचणूक आयोग तर ठाम आसा आनी अशे परिस्थितींत मताधिकार यात्रेचे बॅण्ड वाजपाचेंच तितलें शिल्लक आशिल्ल्याचें दिसून येता. एकूच निश्कर्श काडप आतां शक्य आसा आनी तो म्हणल्यार राहुल आनी तेजस्वी ह्या दोगांकूय जें अपेक्षीत आसा ते खातीर अजून खूबसो काळ रावचें पडटलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
