तेजराणा, ललित हांचे आकर्शक दोट्टी शेंकडे

भांगरभूंय | प्रतिनिधी

अभिनव तेजराणा आनी ललित यादव हांच्या दोट्टी शेंकड्यां नेटार तशेंच चवथे विकेटी खातीर केल्ले 309 धांवड्यांचे भागिदारीक लागून येजमान गोंय पंगडान चंदीगड पंगडा आडचे रणजी एलीट ब गटांतले चार दिसांचे लडतीच्या दुसऱ्या दिसा आपल्या पयल्या डावांत 566 धांवड्यो केल्यो. चंदीगडाचो स्पिनर विष्णू कश्यपान 7 विकेटी घेतल्यो.

पीसीए वयलो दुसऱ्या दिसाचो खेळ सोंपलो त्या वेळार चंदीगडान आपल्या पयल्या डावांत 1 विकेट व्हगडावन 34 धांवड्यो केल्ल्यो. गोंया खातीर आयज तिसरो दीस म्हत्वाचो आसतलो.

गोंया कडेन अजून 532 धांवड्यांची आघाडी आसा. आनी लडतीचे दोन बाकी आसात. काल 3 बाद 291 धांवड्यां वयल्यान मुखार खेळपाक सुरवात केल्ल्या गोंयान आपल्या डावांत आनीक 275 धांवड्यांची भर घाली. 130 धांवड्यांचेर खेळपी अभिनव तेजराणान आपले पयले रणजी मॅचींत दोट्टी शेंकडो नोंदयलो. ताणें 320 बॉलांक तोंड दितना 205 धांवड्यो केल्यो. हातूंत 21 चवक्यांचो आनी चार सक्यांचो आस्पाव आशिल्लो.

पदार्पणाचे मॅचींत दोट्टी शेंकडो मारपी अभिनव तेजराणा हो गोंयचो पयलो आनी देशांतलो 13वो बॅट्समन थारलो.

80 धांवड्यांचेर खेळपी ललित यादवान लेगीत दोट्टी शेंकड्याची नोंद केली. ताणें 393 बॉलांक तोंड दितना 213 धांवड्यांची खेळी केली. ताणें 22 चवके आनी तीन सके मारले. गोंया खातीर प्रॉफेशनल क्रिकेटर म्हणून आपली पयली मॅच खेळटना दोट्टी शेंकडो मारलो. तो सगल्यांत अखेरेक बाद जालो. ताका वैयक्तीक 90 आनी 153 धांवड्यांचेर जीवनदान मेळ्ळें.

मुखेली दिपराज गांवकार, अर्जुन तेंडुलकर, मोहित रेडकार आनी समर दुभाषी हांणी बॅटिंगेक निर्शेणी हाडली. दर्शन मिशाळान 32 धांवड्यो केल्यो. चंदीगडा वतीन ऑफ स्पिनर विष्णू कश्यप सगल्यांत येसस्वी बॉलर थारलो. ताणें 173 धांवड्यो दिवन 7 विकेटी घेतल्यो. निशुंक बिर्लान 137 धांवड्यो दिवन 3 विकेटी मेळयल्यो.

चंदीगडाक काल आठ ओव्हरी बॅटींग करपाक मेळ्ळी. अर्जुन तेंडुलकरान ओपनर शिवम भांब्रीक वैयक्तीक 2 धांवड्यांचेर एलबीडब्ल्यू बाद केलो आनी गोंयाक बरी सुरवात करून दिली. दुसऱ्या दिसाचो खेळ सोंपलो त्या वेळार अर्जुन आजाद 21 जाल्यार मुखेली मनन व्होरा 11 धांवड्यांचेर खेळटालो.

धांवतकटोः पयलो डाव (सगले बाद 566) अभिनव तेजराणा कॅ अंकित कौशिक बॉ विष्णु कश्यप 205, ललित यादव कॅ भागमेंदर लेथर बॉ निशुंक बिर्ला 213, दिपराज गांवकार कॅ अर्जुन आझाद बॉ विष्णू कश्यप 4, दर्शन मिशाळ कॅ अंकित कौशिक बॉ विष्णू कश्यप 32, अर्जुन तेंडुलकर कॅ आनी बॉ विष्णू कश्यप 1, मोहित रेडकार कॅ अंकित कौशिक बॉ निशुंक बिर्ला 8, समर दुभाषी बो निशिंक बिर्ला 14, हेरंब परब नाबाद 0.

बॉलींगः जग्गी सिंग संधू 22-3-60-0, सैनी 12-0-52-0, विष्णू कश्यप 45-2-173-7, राजांगड बावा 21-4-46-0, निशुंक बिर्ला 35.4-3-137-3, शिवम भांब्री 1-0-6-0, भागमेंदर लाथेर 23-4-70-0, अर्जुन आझाद 1-0-8-0.

चंदीगडः पयलो डाव (1 बाद 34) शिवम भांब्री एलबीडब्ल्यू बॉ. अर्जुन तेंडुलकर, अर्जुन आझाद खेळटा 21, मनन व्होरा खेळटा 11.

बॉलींगः अर्जुन तेंडुलकर 4-1-10-1, दर्शन मिशाळ 2-1-5-0, हेरंब परब 1-0-13-0, मोहित रेडकार 1-0-6-0.