तेजराणा, अर्जुनाक लागून गोंयचो केएससीएचेर शेक

भांगरभूंय | प्रतिनिधी

जबरदस्त फॉर्मांत आशिल्ल्या अभिनव तेजराणाच्या उत्कृश्ट नाबाद अर्द शेंकड्याक लागून गोंय पंगडान अल्लूर-2 गोल्डन ओव्हलाचेर चालू आशिल्ले कॅप्टन थिमाप्पा स्मृती चार दिसांचे लडतीच्या पयल्या दिसाचे आपलो शेक दवरलो.

पयलीं अर्जुन तेंडुलकरान 41 धांवड्यो दिवन घेतिल्ल्या 5 विकेटींक लागून केएससीए इलेव्हनाचो पयलो डाव फकत 103 धांवड्यांचेर गुठलावपाक गोंय पंगडाक येस आयलें. ते उपरांत गोंयान आपल्या पयल्या डावांत 1 विकेटी व्हगडावन 149 धांवड्यो केल्यो. अभिनव तेजराणान सर्तींतलो आपलो चवथो अर्द शेंकडो पुर्ण केलो.

गोंय 46 धांवड्यांनी मुखार आसा. ते पयलीं केएससीए इलेव्हनान टॉस जिखून पयलीं बॅटींग करपाचो निर्णय घेतलो. पूण, थारावीक अंतरान ताचे बॅट्समन बाद जाले. ऋत्विक नायकान 27 धांवड्यो दिवन 3 जाल्यार हेरंब परबान 30 धांवड्यो दिवन 2 विकेटी घेतल्यो. केएससीए इलेव्हना वतीन अक्षण रावान 98 बॉलांनी सगल्यांत चड 52 धांवड्यो केल्यो. हातूंत 7 चवक्यांचो आस्पाव आशिल्लो.

गोंयच्या ओपनरांनी सर्तींत पयले खेपे जबरदस्त प्रदर्शन केलें. रोहन कदम आनी अभिनव हांणी पयले विकेटी खातीर 106 धांवड्यांची भागिदारी केली. रोहन कदमान 73 बॉलांनी 45 धांवड्यो केल्यो. ताणें सात चवके मारले. रोहन बाद जाल्या उपरांत तेजराणान मंथन खुटकारा वांगडा मेळून दुसरे विकेटी खातीर नाबाद 43 धांवड्यांची भागिदारी केली. केएससीए खातीर संतोख सिंगान एक विकेट घेतली.

थोडे भितर धांवतकटोः केएससीए इलेव्हन, (पयलो डाव) 36.5 ओव्हरींनी सगले बाद 103 धांवड्यो ( अक्षण राव 52, शरथ श्रीनिवास 18, मोहसीन खान 10 धांवड्यो, बॉलींगः ऋत्विक नायक 11.5-27-3, अर्जुन तेंडुलकर 13-41-5, हेरंब परब 9-30-2, दीपराज गांवकार 3-4-0), गोंय (पयलो डाव) 46 ओव्हरींनी 1 बाद 149 धांवड्यो (रोहन कदम 45, अभिनव तेजराणा खेळटा 80, मंथन खुटकार खेळटा 20, बॉलींगः संतोख सिंग 11-45-1).