तेंबवाडो मोरजेचे दर्यादेगेर कांसवान घालीं ९८ तांतयां
भांगरभूंय | प्रतिनिधी
पेडणें, प्रतिनीधी: तेंबवाडो मोरजेचे दर्यादेगेर दर्यांतल्या कांसवान ९८ तांतयां घालीं. हांगां १९९७ वर्सा सावन दर्याच्या कांसवांची जतनाय घेवपाची मोहीम येसस्वीपणान चालीक लायल्या. थळावे नागरीक, थळावे पर्यटक हंगामांतले शॅक वेवसायीक आनी सरकाराच्या रान विभागा वरवीं ही मोहीम आयज मेरेन येसस्वीपणान राबोवपाक येस आयलां.
दर्यांतले कांसव शांत आशिल्ले दर्यादेगेर येवन मोव रेंवेंत तांतया घालून ते थंयच्यान वतात. तांतयां घातल्या उपरांत सैम प्रक्रिये उपरांत ५० ते ५२ दिसांनी त्या तांतयांतल्यान पिलां भायर सरतात. हीं पिलां तांतयांतल्यान भायर सरल्या उपरांत तांकां दर्याचें उदक चकचकीत दिसता आनी तीं तें दिकेन आपोआप वतात. पूण आतां सगळ्याच दर्यादेगांचे लायटींचो उजेड पडिल्ल्यान त्या पिलांक खंयच्यान उदकांत वचप हें कळना आनी तीं बुचकळ्यांत पडटात. ताका लागून रान विभागाचे कर्मचारी, अधिकारी येवन त्या पिलांक एकठांय करून सांजेवेळार दर्यांत सोडटात.
मोरजे, आश्वें-मांद्रें ह्यो दोन दर्यादेगो सध्या कांसव संवर्धन मोहिमेक लागून संवेदनशील जाहीर केल्यात. हे शिमेर ५० मिटरच्या अंतराचेर कसलेच तरेचें संगीत वाजोवपाक निर्बंध घातल्यात. पूण ह्याच दर्यादेगेर व्हडा प्रमाणांत आवाजाचें प्रदूशण जाता. हाचेर कारवाय करपाची मागणी जातना दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
