भांगरभूंय | प्रतिनिधी
खर्या आयकुप्या कडेन नमळाय आसता आनी हांवपण नासता. बरो आयकुपी उलयणार्याचो आदर करता.
उलोवप आनी आयकप हीं खंयच्याय संवादाचीं, भासाभाशेचीं आनी वेव्हाराचीं दोन मुखेल आंगां आसात. पूण हालींच्या काळांत वचत थंय आयकुपां परस उलोवपांच हिसपा भायर चड जाल्ली दिश्टी पडटात. ‘हांव सांगतां, तूं आयक’ अशा अर्थाचे धेंक खंयच्याय बी बसकांनी वा संमेलनांनी आयकूंक येतात. खरें म्हणचें बर्या वैचारीक फलश्रुती खातीर उलोवपा परस आयकप खूब चड आसप भोवच गरजेचें आसा. आमकां देवान एकूच चीब दिल्या, पूण कान मात दोन दिल्यात. हाचो संकेत असो की आमी जितले उलयतात ताचे दुपेटीन आयकूंक जाय. आमी सगले जाण फक्त उलोवपाक फुरफुरतात आनी बोवाळाक आपोवणें दितात. उलोवप आवाजाची निर्मणी करता. हाचें उरफाटें आयकुपाची बुनेद आसा शांती, आनी शांती ही आवाजा परस श्रेश्ठ आनी बळिश्ट आसता.
एक फावटी खंय आवाज आनी शांती हांचें मदीं पेटलें. आवाज शांतीक जिनसांवार उतरांनी खेपूंक लागलो. तो तिका ‘भिजूड, निर्बळी, नेवळट, मोनी, बेजारें, चैतन्यहीन, मेल्ल्या वारीची’ बी म्हणूंक लागलो. उपरांत ताणें तांच्या दोगांय भितर श्रेश्ठ हें थारावपाक आपणा वांगडा सर्त कर कशें शांतीक आव्हान दिलें. आवाजाचें आव्हान शांतीन मुकाट्यांनी स्विकारलें.
जालें, सर्तीक आरंभ जालो. आवाजान तरातरांचें ध्वनी काडले. पयलीं पयलीं ल्हान उपरांत व्हडले. मागीर आनिकूय काडले. शांती बाबडें ओग्गी रावलें. उलयल्यार तें शांती उरचें नासलें. करतां करतां आवाजान उग्र रूप धारण केलें. कानठळे फोडपा सारके कडकडाट, धडधडाट, गडगडाट अशे एका फुडले एक गगनभेदी आवाज भायर काडले. तरिकूय शांतताय ओग्गी. करतना आवाजाचे सगले आवाज सोंपले. तरातरांचे आवाज काडून आवाजाचो ताळो पडलो. तो बरशेलो, निरशेलो आनी शेकीं आपुणूच खासा शांतताय जालो.
कोणूय आयकता तें बरें करून कान दिवन आयकप हो एक उजू गूण, आनी उलोवपा परस आयकप हें सदांच श्रेश्ठ आसता. न्यायालयांत वकील उलयतात. पूण न्यायमुर्ती लक्ष दिवन आयकता. तांचेर मनन-चिंतन करता आनी योग्य तो निर्णय घेता. विधानसभांनी आनी संसद भवनांनी आमदार आनी खासदार उलयतात. पूण सभापती तें लक्ष दिवन आयकता आनी वेळावेळार लोकप्रतिनिधींक मार्गदर्शन करता. कित्याक तर, खरेपणानिशी तो उत्सूक आयकुपी earnest listener आसता. आमी देवाक होरायतात. ताचे कडेन तरेकवार मागण्यो करतात. प्रसाद पाकळ्यो लायतात आनी गाराणीं घालतात. पूण परमेश्वर मात कांयच उलयना तो फक्त आयकता आनी कितें करूंक जाय तें मुकाट्यांनी करता.
आयकप म्हणजे मुखा वेल्या मनशाक सारको बरो समजून घेवप. ताका आपणाले विचार पुरायेन मांडपाक संद दिवप. खर्या आयकुप्या कडेन नमळाय आसता आनी हांवपण नासता. बरो आयकुपी उलयणार्याचो आदर करता. सारकें बरें मन लावन आयकप ही एक साधना. ध्यान साधने वरींच. अमेरिकन मनोविज्ञानीक कार्ल रोजर्स हो सक्रीय श्रवणाचो खर पुरस्कर्तो आसा.
सामके मन लावन आयकुपाची एक देखिवंत पत महाभारत महाकाव्यांत पळोवंक मेळटा. राजा परिक्षीत हो अर्जूनाचो नातू. तो सोरोप चाबून सात दिसां भितर मरतलो असो ताका श्रंगी रुशीन शिराप दिल्लो आसता, आनी हो राजा आपणाल्या जिणेंतल्या निमाण्या सात दिसांनी शुकदेव मुनी कडल्यान भोवच तन्मयतेन भागवत कथा आयकतालो!
आनीक एके गजाली वयल्यान आयकुपाची व्हडविकाय कळटा. ती म्हणजे आमचे समेस्त वेद आनी उपनिशदां हे एके पिळगे कडल्यान दुसरे पिळगे कडेन पावले ते आयकुपाच्या माध्यमाक लागून. म्हणून तांकां श्रुती म्हणटात. कित्याक तर तेदेवेळा लिपयो नाशिल्ल्यो आनी म्हणून बरपां नासलीं.
प्रदीप लवंदे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
