भांगरभूंय | प्रतिनिधी
चिंतन – 88
आमी घरांत बसून व्हडलीं सपनां पळयतात, व्हडली सुवात मेळोवपाची कल्पना करतात, पूण ताका जाय आशिल्ले कश्ट, जिद्द आनी जापसालदारकी आमी घेतली ना जाल्यार तीं सपनां फकत दिवास्वप्नांच उरतात.
बारावे यत्तेंतल्या एका भुरग्यान म्हाका सांगलें, “सर, म्हाका सीए जावपाचो आसा.”
हांवें विचारलें, “कितें तयारी सुरू केल्या?” ताणें म्हणलें, “अजून ना, पूण इत्सा आसा.” मागीर हांवें ताका तुकोबांच्या अभंगांतली ओळ सांगली,
“घरामध्ये राजा।
नव्हे हो पट्ट पूजा।।”
तुकाराम महाराजाचें हें सादें पूण मार्मिक विधान आमकां एक व्हडलो धडो शिकयता -“फकत इत्सा करून राजा जावंक मेळना; ते खातीर कामाची, स्विकाराची आनी परिक्षांची पट्टपुजा लागता.”
राजा जावप, भंयाचेर मात करप, सुसंगत रावप, कठीण परिस्थितींत खंबीर रावप हीच खरी पट्टपूजा आसता. फकत ‘म्हाका जावंक जाय’ ही इत्सा फावशी ना. ती इत्सा साकार करपी कृती हीच खरी ‘राज्याभिशेकाची तयारी’.
आमचे कुशीक एक बायल आशिल्ली- शशिकला ताई. सादें शिक्षण, व्हडलें कुटुंब. पूण त्या घरांतल्या सगळ्यांचे प्रस्न, खर्च आनी निर्णय तिणें शांतपणान हाताळ्ळे. कोण दुयेंत पडलो जाल्यार ती धांवताली; घरांतल्या भुरग्यांक शाळेंत ती आदार करताली; ती उत्सवांची तयारी करताली.
एकदां हांवें तिका मजेंत विचारलें, “ताई, हें सगळें कशें सांबाळटा?” हाचेर तिणें हांसून म्हणलें, “जापसालदारकी घेतली काय लोक आमकां मानतात.”
ती ताई शिंवासनाचेर बसूंक नाशिल्ली, पूण तिच्या कर्तुबांक लागून लोकांनी तिका घराची “राणी” मानिल्ली.
ल्हान दुकानांत काम करपी रामू म्हाका खूबदां दिसतालो. मालक न्हिदिल्लो आसतना लेगीत हो चलो दुकान सांबाळटालो, गिरायकांक हांसत जाप दितालो आनी पयशांनी केन्नाच चूक करिनाशिल्लो.
दोन वर्सां उपरांत मालकान दुकान ताच्या हातांत दिलें. किद्याक? कारण रामून ‘राजा’ जावपाची विनंती करूंक नाशिल्ली- तो दर दिसा आपल्या कामाची पुजा करतालो.
घरांत बसून मनांत राज्य करपाची कल्पना करून कांयच जायना.
राजा वा फुडारी जावपाक जाय जाल्यार संवसारांत भायर सरून कश्ट करचे पडटात आनी कामांतल्यान आपली पात्रताय सिद्ध करची पडटा. कलाकार जावपाक जाय जाल्यार सरावाच्या वरां पुजा करची पडटा. शिक्षक जावपाक जाय जाल्यार भुरग्यांच्या प्रस्नांक मोगान जाप दिवपाक तयार रावचें पडटा.
इत्सा ही सुरवात, पूण कृती हो राज्याभिषेक. जापसालदारकी हीच पट्टपूजा.
– देवदत्त दिगंबर परुळेकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
