भांगरभूंय | प्रतिनिधी
एका दिसा एके कंपनींत काम करप्यांक एक टूर (tour) आशिल्लो. प्रकाश कांय दीस वावराक हाजीर नाशिल्लो. पूण त्या दिसा टुराक वचूंक तो तयार जाल्लो. ताका पळेवन ताचे बरोबरच्या एका वावुरप्यान अशें म्हळें, “तूं आमच्या सांगाता येताय?” प्रकाशान हय म्हूण जबाब दितकच दुसऱ्या वावुरप्यान सरळ म्हळें: “तूं कित्याक येताय? तूं आमकां एकस्ट्रा लगेज मुरे!”
आमी खंयसरूय रावंक वतात तेन्ना आमकां जाय तें घेवन वतात. ताका आमी ‘लगेज’ ‘म्हणटात. आमची लगेज एक्स्ट्रा केन्ना जाता? दुसऱ्यांचीय लगेज आमी घेतात तेन्ना आमकां ती लगेज एक्स्ट्रा जाता. खरें म्हळ्यार लगेज हाचो अर्थ, आमकां गरजेचें तें. ही लगेज गरजेची आसुनूय थोडीं आमकां आवडनात आनी थोडीं आमकां आवडटात. आवडटात ती म्हळ्यार आमकां गरजेची ती लगेज. आमकां आवडनात तिवूय लगेज आमकां व्हारची पडटा. एका शिबिराक वा टुराक आमी वतात तेन्ना शिबीर चलयतले कांय सक्तीच्यो वस्तू हाडूंक सांगतात. ह्यो वस्तू आमकां आवडटातूच अशें न्हय. त्यो आमकां आवडनात जाल्यार पसून आमकां ती लगेज जाता. दुसऱ्या अर्थान त्यो वस्तू आमकां गरजेच्यो जातात. आमच्या जम्याच्या बरेपणा खातीर आमची लगेज वाडटा. ‘एक्स्ट्रा लगेज’ म्हळ्यार आमकां नाका ती.
जिणेंतूय सांगाता जियेताना जायते फावटी आमचे सांगाता जियेतलीं आमकां एक्स्ट्रा जातात. आमच्या सांगाता जियेतलीं थोडीं आमकां आवडटात. आमकां जाय तशीं तीं वागतात. आमी कितेंय केल्यार तीं मानून घेतात. असलीं मनशां आमच्या मता परमाणें समुदायीक जीण जियेतात. थोडीं आमकां आवडनांत. आमकां जाय तशी म्हळ्यारच आमच्या कुंपासार तीं नाचूंक सोदिनात. तांचो आमी दुस्वास करतात तरूय आसsना सोंशीक जावन आमी तांच्या वांगडा जियेतात.
तिसऱ्या घटांतलीं आमकां ‘एक्स्ट्रा’ जातात. हीं एक्स्ट्रा म्हूण आमी तकटे दिल्लीं आमची फावो न्हय तसली वागणूक तोंडार मारतात. प्रवादीक जीण जियेतात. फावो न्हय तसलें घडलें जाल्यार बरोबर जियेतल्यांचे नदरेक हाडटात. पूण कितें घडलें तेंच घेवन बसनात. दुसऱ्यांक आसा तशींच मानून घेतात. तडजोडीची वृत्ती तांच्या शब्दकोशांतूच आसना. असल्यांक आमचे मदलीं जायतीं जाणां नदरेक पसून घेनात.
एके कचेरींत सपना हें तरणाटे वावुरतालें. संगाता वावुरपी विचित्र तरेन वागतालीं. अनैतीक संबंदूय तांचे मदीं आसले. सापनांकूय असल्या संबंदाक बळ करतालीं. सपना, तांची वागणूक सारकी ना म्हूण तांकां सांगतालें. सपना तांकां आडखळ जाल्लें. आयच्या कंप्युटर युगाचो फायदो घेवन कचेरींत वावुरतल्यांनी सपना तांकां, ताचे लागीं लिंगी भोग घे म्हणटा म्हूण व्हिडियो तयार केलो आनी वरिश्ठांक धाडलो. सपनाचेर कारवाय जाली आनी ताका वावराचें काडून उडयलें. आयज धाडशी सपना आपलो स्वताचो धंदो करता आनी स्वताक गवाय दिता.
आमी, आमचेच म्हूण मानून घेतिल्ले इश्ट-मित्र परिस्थिती परमाणें इश्टागतिचीं वेगळीं वेगळीं रुपां दाखयतात. इश्टागतीत कितेंय वयर सकयल जालें जाल्यार सगलो इतिहासूच भायर सरता. तुजी वाटूच बदलता. असल्या वेळार आमी आवडनात म्हूण कसलोच संबंद दवरिनासतना आमी ‘एक्स्ट्रा लगेज’ म्हूण लेखिल्लें मनीसपण मानून घेवन आमच्या आदाराक पावतात. हें सगलें मानून घेवंक आमकां व्यापक (broad) दिशा आनी मन जाय. आमी चडशे फावटी तात्पुरत्या संबंदाचेर भर दीवन जियेतात. कोण आमची फावो न्हय तसली वागणूक पसून मानून घेतात तांचेच लागीं आमी संबंद दवरुंक खुशी दाखयतात आनी आमचेंच हांशें करून घेतात.
आमी खिणा पुरतेच जियेवपी न्हय. आमकां लांब काळ जियेवपाचें आसा. दर एक खीण आमी जियेतात तें जालेंच पूण तो खीण खयंच्या हेतून जियेतात तें गरजेचें. आयची परिस्थिती, आमी फावो तेच परीं, आमकां मनीस कशें सोबता तेच परीं जियेवंक जाय. हें आमकां एक आव्हान.
जॉन एम्. आल्फोंसो कार्मेलीत
7666519837
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
