भांगरभूंय | प्रतिनिधी
तुवालू, खबरां संस्था ः तुवालूच्या एक तृतीयांश लोकां परस चड लोकांनी संवसारांतल्या पयल्या ‘क्लायमेट व्हिसा’ खातीर अर्ज केला. जाका लागून तांकां ऑस्ट्रेलियांत कायमचे रावपाक मेळटलें. व्हिसा खातीर अर्ज करपाची प्रक्रिया 16 जून सावन सुरू जाली. पूण दर वर्सा फकत 280 जाणांक लॉटरी वरवीं हो व्हिसा दितले.
तुवालू हें अमेरिकेचे हवाई शार आनी ऑस्ट्रेलियाच्या मजगतीं दक्षीण प्रशांत म्हासागरांत आशिल्लो एक ल्हान जुंव्या वयलो देश आसा. हो दर्याथरा सावन फकत ६ मीटर उंचायेचेर आसा. हवामानांतल्या बदलाक लागून दर्याची पातळी वाडिल्ल्यान देशाक बुडपाचो धोको आसा.
संयुक्त राश्ट्रांच्या उदरगत कार्यावळीच्या अहवाला प्रमाण, 2050 मेरेन तुवालूचो अर्दो वाठार दर्यांत बुडटलो. हाका लागून चडशे लोकांक देश सोडपाची इत्सा आसा. आतां मेरेन 1,124 जाणांनी अर्ज केला. तातूंत तांच्या कुटुंबांतल्या वांगड्या सयत 4,052 जाणांचो आसपाव आसा. २०२२ च्या जनगणने प्रमाण तुवालूची वट्ट लोकसंख्या सुमार 10,643 आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
