तुळशीच्यो जाती आनी तांचे फायदे…..
भांगरभूंय | प्रतिनिधी
हिंदू धर्मांत तुळस वनस्पतीक खूब म्हत्व आसा. तुळशीची पुजा केल्यार घरांतली नकारात्मक उर्जा पयस जाता असो समज जावन आसा. देवळांनी आनी लोकांच्या घरांनी तुळस ही वनस्पत आसताच. हिंदू धर्मांत दर वर्सा कार्तिक म्हयन्यांत एकादशीच्या दुसऱ्या दिसा तुळसीचें लग्न करतात. धर्मीक ग्रंथां प्रमाण तुळशीची वनस्पत सकारात्मकतायेचें प्रतीक जावन आसा. आनी तुळशीची वनस्पत शेंकड्यांनी वर्सां फकत सकारात्मकतायेचो स्त्रोत म्हणून न्हय, तर वखद म्हणूनय वापरतात. आयुर्वेदांतल्या जायत्या घरगुती उपचारांत तुळसीचीं पानां वापरतात.
सादारणपणान तुळसीच्यो ६० परस चड जाती आसात, ज्यो भारता सयत संवसारभर मेळटात, हांतूतल्यो जायत्यो जाती हिमालय आनी मध्य उदेंत वाठारांत मेळटात. तुळशीची लांबाय तीन फूट वा ताचे परस चड आसूं येता. भारतात तुळसीचे चार प्रकार चड चर्चेत आसात.
श्यामा तुळस – जांबळ्या पानांक लागून श्यामा तुळस हें नांव पडलें अशें म्हण्टात. वेदांप्रमाण भगवान श्रीकृष्णाचोय रंग गडद आसा. गळ्यांतले संसर्ग आनी खोंकली पसून सुटका मेळोवपा खातीर श्यामा तुळसीचो वापर करतात.
रामा तुळस – रामा तुळस लोकांच्या घरांत सहज मेळटा. बंगाल, बिहार सोडल्यार ही तुळस चीन आनी ब्राझीलांतय सांपडटा. रामा तुळसीक थंड करपी रूची खातीर वळखतात.
रानांतली तुळस – भारत, श्रीलंका, जावा आनी आफ्रिकेंतल्या उत्तर वाठारांनी रानांतली तुळस सांपडटा. रानांतली तुळस रामा आनी श्यामा तुळसी परस वेगळी आसा. तातूंत अॅन्टी एजिंग घटक आसतात.
कापूर तुळस – कापूर तुळस ही सुखद वासाक लागून वळखतात. मलेरिया, अतिसार, ब्राँकायटीस आनी काती संबंदीत समस्यां खातीर कापूर तुळशीचो उपेग करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
