भांगरभूंय | प्रतिनिधी
जीत आरोलकारः मांद्रें मतदारसंघांतल्ल्या प्रकल्पांचो मुख्यमंत्र्यान घेतलो नियाळ
भांगरभूंय । प्रतिनिधी
पेडणें: तुयें हॉस्पिटलाचें काम निमाण्या पांवड्यार पावलां. फुडल्या तीन म्हयन्यांत हो प्रकल्प पुराय जातलो, असो विस्वास मांद्रें मतदारसंघाचे आमदार जीत आरोलकार हांणी उक्तायला.
मुख्यमंत्री डॉ. प्रमोद सावंत हांणी शेनवारा मांद्रें मतदारसंघांतलें तुयें हॉस्पिटल, तुयें इलेक्ट्रॉनीक सिटी आनी हेर व्हड प्रकल्पांचे उदरगतीचो नियाळ घेवचे खातीर बसका घेतली. सचिवालयांत जाल्ले बसकेक आमदार आरोलकार आनी हेर अधिकारी हाजीर आशिल्ले.
मुख्यमंत्र्यान संबंदीत विभागांक सगळे प्रकल्प पुराय करपाक प्राधान्य दिवपाचे निर्देश दिले. तशेंच मांद्रें मतदारसंघाचे उदरगती खातीर सरकारा कडल्यान भरीव आदार दिवपाचें तांणी आस्वासन दिलें. हे म्हत्वकांक्षी प्रकल्प पुराय करपाक लक्ष दिल्ले खातीर आमदार आरोलकार हांणी मुख्यमंत्र्यांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
