भांगरभूंय | प्रतिनिधी
पेडणें: आदले मुख्यमंत्री प्राचार्य लक्ष्मीकांत पार्सेकार हांणी फुडाकार घेवन उबारिल्लें तुयेंचे हॉस्पिटल बांबोळी हॉस्पिटलाक लिंक करून २६ जानेवारी पयलीं सुरू करचें. तशेंच तातूंतल्यो ८० टक्के नोकऱ्यो, कंत्राटां पेडणें तालुयांतल्याच तरणाट्यांक मेळच्यो. ना जाल्यार हें आंदोलन आनीक खर करतले, अशी शिटकावणी तुयें हॉस्पिटल कृती समितीन आयोजीत केल्ले सभेंतल्यान दिली.
हॉस्पिटल वाठारांत आयोजीत केल्ले बसकेक पार्सेचे आदले सरपं देवेंद्र प्रभुदेसाय, मांद्रेंचे पंच एडवोकेट अमित सावंत, आदले जिल्लो पंचायत वांगडी दीपक कलंगूटकार, मांद्रेंचे आतांचे पंच बाळा उर्फ प्रशांत नायक, तुयें हॉस्पिटल कृती समितीचे तुळशीदास राऊत, संजय राऊत, जोज लोबो, एडवोकेट प्रसाद शहापूरकार, सदानंद वायंगणकार, भास्कर नारुलकार, तुयेंचे आदले सरपंच निलेश कांदोळकार, व्यंकटेश नायक ,मिशन फॉर लोकलचे राजन कोरगांवकार, संतोष मांद्रेकार, सुशांत मांद्रेंकार आनी हेर हजर आशिल्ले.
हे जाहीर सभेंत मुखेल मुद्दे मांडले. तशेंच कांय म्हत्वाचे थाराव मांडले. हें हाॅस्पिटल बांबोळी हॉस्पिटलाक लिंक करतना थंय दोतोर, नर्सी तशेंच हेर स्टाफ आसा तांची बदली तुयें हॉस्पिटलांत करची. ८०% नोकर्यो पेडणें म्हालांतले जनतेक मेळच्यो. त्यो कशो मेळच्यो? हे विशीं सरकारान कायदो करचो अशी मागणी सभेंत उलोवपी फुडाऱ्यांनी केली. कृती समितीन पेडणें म्हालांतले दरेके ग्रामपंचायतींत वचून निवेदन सादर केलें. त्या त्या सरपंचांनी हॉस्पिटल सुरू करचें. हे खातीर समिती वांगडा आसा, अशें आस्वासन दिलां.
मात आयचे हे बसकेक एकूय सरपंच कित्याक हजर रावूंक ना? त्या सगल्या सरपंचांक ग्रामस्थांनी ग्रामसभांनी ह्या हॉस्पिटला विशीं प्रस्न विचारचे. तांचेर राज्य पांवड्या वयल्या कोणा लोकप्रतिनिधीचें चेंपण आसा काय, तेंय तांणी सांगचें, असो निर्णय सभेंत घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
