भांगरभूंय | प्रतिनिधी
पेडणें: तुयें हॉस्पिटल बांबोळी हॉस्पिटलाक लिंक करतले. शंभर खाटींचें हॉस्पिटल आनी वांगडाच १२ वॉर्ड कार्यरत दवरतले. ज्या पद्धतीन बांबोळी हॉस्पिटलांत सुविधायो आसात, तश्योच सुविधा तुयें हॉस्पिटलाक उपलब्ध करपा खातीर हें हॉस्पिटल सुरू करपाक कळाव जाता. हे खातीर भलायकी मंत्री विश्वजीत राणे, भलायकी अधिकारी हांचे कडेन म्हत्वाची बसका जाल्ल्याची म्हायती आमदार जीत आरोलकार हांणी मांद्रेंच्या आपल्या कार्यालयांत पत्रकार परिशदेत दितना सांगलें. येवपी विधानसभेच्या अधिवेशनांत हॉस्पिटलाची सविस्तर म्हायती भलायकी मंत्री विश्वजीत राणे नक्की दितले, असोय विस्वास तांणी उक्तायलो.
हॉस्पिटलाचे पुराय प्रक्रियेंत जें अर्दवट काम आशिल्लें तें काम आतां पुराय केलां. आदल्या कंत्राटदारान कामाकडेन घाळपणां केल्ल्यान ताका ब्लॅकलिस्टांत घालून, परत नवो टँडर काडून दुसर्या कंत्राटदराक काम दिलें. हाका लागूनच हॉस्पिटल सुरू करपाक कळाव जालो अशी म्हायती आमदार आरोलकार हांणी दिली.
आयडीसीन हेल्थ डिपार्टमेंटाक हें हॉस्पिटल दिले उपरांत दोनूय विभागांचे अधिकारी एकदां ह्या हॉस्पिटलाची पळोवणी करून, उपरांतूच ओके म्हणून फुडली प्रक्रिया पुराय करतले. मात तांत्रीक आडमेळीं कितें आसतात? हेंय समजून घेवपाची गरज आसा, अशें तांणी मुखार म्हणलें.
मुख्यमंत्री डॉ. प्रमोद सावंत हांणी डिसेंबरांत हें हॉस्पिटल सुरू जातलें अशी तारीख दिल्ली. मात ती तारीख हॉस्पिटल सुरू करपा खातीर नाशिल्ली. तर ज्यो कितें तांत्रीक आडमेळीं आसात, हॉस्पिटलाचें उरिल्लें काम आसा ते खातीर आशिल्ली, अशें आमदारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
