भांगरभूंय | प्रतिनिधी
पेडणें: पेडणेंच्या लोकांचे मागणे प्रमाण तुयेंच्या शंभर खाटींचें १०० कोटीं परस चड खर्च करून उबारिल्लें तुयें हॉस्पिटल हें गोमेकॉ हॉस्पिटलाक लिंक करूनच सुरू करतले. सरकारान जनतेची मागणी मान्य केल्ल्यान जे पद्धतीन बांबोळी हॉस्पिटलांत सुविधा मेळटात. त्योच सुविधा ह्या हॉस्पिटलांत मेळटल्यो आनी तशे तरेची गवाय मुख्यमंत्री प्रमोद सावंत हांणी दिल्या. हांगा वट्ट १२ ओपीडी करतले, अशी म्हायती मांद्रेचे आमदार जीत आरोलकार हांणी दिली.
तुयें हॉस्पिटल हें गोमेकॉ हॉस्पिटलाक लिंक करचें हे मागणे खातीर तुयें हॉस्पिटल कृती समितीन आंदोलन उबारलें, मशाल मिरवणूक काडली. उपरांत सरकारान दखल घेवन हें हॉस्पिटल गोमेकॉ हॉस्पिटलाक लिंक करतले अशे तरेची अधिसुचवणी काडली. मात कृती समितीचें म्हणणें आसा, ३० तारखेर सरकारान तुयें सामुदायीक भलायकी केंद्र ह्या हॉस्पिटलांत स्थलांतरीत करपाचे सुवातेर बांबोळे हॉस्पिटलांत आसात त्यो सुविधा हांगा सुरू करच्यो, ना जाल्यार खर आंदोलन करपाचो पुनरुच्चार कृती समितीन केला. ते विशीं आमदार जीत आरोलकार हांकां हे विशीं विचारलें तेन्ना तांणी वयली म्हायती दिली.
आमदार जीत आरोलकार हांणी सांगलें, जीएमसी लिंक हो शब्द उच्चारिल्ल्यान तीच सेवा तुयें हॉस्पिटलांत मेळप गरजेचें आनी ते विशीं सरकारूय सिरियस आसा.
गैरसमज निर्माण करूं नाकात
आमदार जीत आरोलकार हांणी सांगलें, नागरिकांनी नाका त्यो प्रतिक्रिया दिवच्यो न्हय. तशेंच गैरसमज निर्माण करचो न्हय. उण्या काळांत सुविधा उपलब्ध जावच्यो नात अशें कांय जाणांचें म्हणणें आसा. मात ३० तारखे पयलीं हॉस्पिटलांत खंयच्यो सुविधा दितले, हाची म्हायती दिवंदी. ती तेच दिवपाक शकतात. अशें आमदार आरोलकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
