भांगरभूंय | प्रतिनिधी
पणजीः तुयें हॉस्पिटला आठ वर्सां जालीं तें बांदून तयार आसा. मात हें हॉस्पिटल सुरु करपाक सरकाराक अजूनय म्हूर्त मेळना. डिसेंबर मेरेन हें हॉस्पिटल उक्तें करिना जाल्यार आंदोलनाक तोंड दिवचें पडटलें, अशी शिटकावणी तुयें हॉस्पिटल कृती समितीन दिल्या.
समितीन तुयेंचे समुदायीक भलायकी हॉस्पिटल येता त्या डिसेंबर मेरेन उक्तें करचें अशी मागणी करपी निवेदन पणजे भलायकी संचालकांक भेटयलें. निवेदन भेटयले उपरांत पत्रकारांकडेन उलयतना समितीच्या वांगड्यांनी ही म्हायती दिली. ह्या वेळार समितीचे अध्यक्ष जुझे लोबो, सचीव तुळशीदास रावत, वांगडी देवेंद्र प्रभुदेसाय आनी वेंकटेश नायक हाजीर आशिल्ले.
लक्ष्मीकांत पार्सेकार हांच्या काळांत, तुयें हॉस्पिटलांचें काम सुरू जाल्लें. हें हॉस्पिटल बांदून तयार जालां. मात हें उक्तें करचें सोडून फाटलीं आठ वर्सा इमारतीक पेंट मारीत आसात, अशें समितीचे वांगडी देवेंद्र प्रभुदेसाय हांणी सांगलें.
ह्या हॉस्पिटलांत 100 खाटी सयत मेडीकल गॅस पुरवण, आॅपरेशन थिएटर, आयसीयू, भुरग्यांचे आयसीयू, रेडीयोलोजी आनी एस्क-रे, पॅथोलोजी लॅब, दंत सर्जरी, ब्लड बँक, डायलेसीस, प्रसुती, दादले आनी बायलां वॉर्ड सयत स्वताचे 33 केव्ही सब स्टेशन्स मंजूर जालां. हे सुविधेक 30 जुलय 2021 वर्सा सरकारान रु. 13.49 कोटी प्रशासकी मान्यताय दिल्ली. मात भलायकी संचालनालयान अजून टेंडर काडूंक ना, अशें प्रभूदेसाय हांणी सांगलें.
जेन्ना आमी ह्या हॉस्पिटलाची फाटपुरवण मुख्यमंत्री आनी भलायकी मंत्री विश्वजीत राणे हांचे कडेन केली तेन्ना मुख्यमंत्र्यान पीपीपी तत्वाचेर हें हॉस्पिटल चलयतले अशें सांगिल्लें. हें हॉस्पिटल जर पीपीपी तत्वाचेर चलयलें जाल्यार फकत फायदो मेजपा खातीर ताचें खाजगीकरण जातलें. गांवगिर्या वाठारांतल्या लोकांक जीएमसींत वयचें पडटा देखून हें हॉस्पिटल जीएमसीकडे लिंक केल्यार हांगच्या गरीब लोकांक ताचो फायदो जातलो, अशी मागणी प्रभुदेसाय हांणी केली.
आमकां थळावे आमदार जीत आरोलकार आनी पेडणेंचे आमदार प्रवीण आर्लेकार हांचे कडेन कसलीच अपेक्षा ना. आमदार सरकार कितें म्हणटा तें आयकतात आनी तांच्या सांगण्या प्रमाण हय म्हणटात. ह्या हॉस्पिटलाचें खरे श्रेय पार्सेकरांक वचत म्हण दयानंद सोपटे हांणी हाचें काम मुद्दाम आडकून उडयिल्ल्याच्यो वावड्यो लोकांमदीं आसात, अशें प्रभुदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
