भांगरभूंय | प्रतिनिधी
भांगरभूंय । प्रतिनिधी
पणजी: सरकाराचे तोंड उगडपा खातीर आतां आमचेर नाक दाबपाची पाळी आयल्या. तुयें हॉस्पिटल बेगिनांत बेगिन सुरू जाले ना जाल्यार 11 जानेवारी सावन उपोशण करतलें, अशी शिटकावणी तुयें हॉस्पिटल कृती समितीचे फुडारी देवेंद्र प्रभुदेसाय हांणी दिल्या. तुयें हॉस्पिटल बेगीन सुरू करपा खातीर समितीन पणजे मुख्यमंत्री डॉ. प्रमोद सावंत हांकां निवेदन भेटयलें. निवेदन भेटयल्या उपरांत तांणी ही म्हायती दिली.
पेडणें म्हालांत फावो ते प्रमाणांत भलायकी सुविधा नात. हाका लागून तुयें हॉस्पिटल बेगिनात बेगीन सुरू करपाची गरज आसा. 11 ते 15 जानेवारी मेरेन तुयें हॉस्पिटला कडेन आमी उपोशण करतलें. हाचे उपरांत 15 जानेवारीक सांजे तुयें आयटीआय ते हॉस्पिटला मेरेन मशाल मिरवणूक काडटले. मिरवणुके उपरांत जाहीर सभा जातली, अशें देवेंद्र प्रभुदेसाय हांणी सांगलें.
पेडणें म्हालांतले दोनूय आमदार सरकार पक्षाचे आसा. तरी लेगीत तुयें हॉस्पिटल सुरू जाय ना. हाका लागून दुयेंतींक म्हापशें वा गोंय वैजकी म्हाविद्यालय हॉस्पिटलात दाखल करचे पडटा. हाका लागून गोमेकॉ वेलो ताण वाडटा. तुयें हॉस्पिटल बेगीन सुरू जाले जाल्यार पेडणेकारांची सोय जावन गोमेकॉ वेलो ताण काय प्रमाणांत उणो जातलो, अशें ह्या वेळार लोकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
