भांगरभूंय | प्रतिनिधी
फुकट नाका, पूण नेमान उदक दिवपाची मागणी
भांगरभूंय । प्रतिनिधी
पेडणें: तुयें पंचायत वाठारांतल्या तुयें सोणयें वाठारांत सध्या पियेवपाच्या उदकाचो खर उणाव जाला. ह्या वाठारांतली उदकाची समस्या सुटावी करचे खातीर तेन्नाचे आमदार दयानंद सोपटे हांणी तुयेंच्या गांवकारवाड्यार एक उदकाची टांकी बांदपाक सुरवात केल्ली. मजगतीं विधानसभा वेंचणुको जाल्यो आनी ते उपरांत टांकयेचें बांदकाम बंद पडलें. ही टांकी बांदून पुराय जावंक नाशिल्ल्यान ह्या वाठारांत उदकाची गंभीर समस्या निर्माण जाल्या.
उदका खातीर ह्या वाठारांतलीं बायलां वळवळे काडटात. जाल्यार दुसरे वटेन भूंयगत वीज केबल घालपाचो वावर करतना रस्त्या कुशीची उदकाची पायपलायन दर दोन दिसां आड फुट्टा. ताकाय लागून ह्या तुयें पंचायतीच्या हेर वाठारांनी उदकाचो उणाव जाता.
गांवकार वाड्याचेर बांदिल्ली उदकाची टांकी ताकतिकेन सुरू करची आनी लोकांची समस्या पयस करची, अशी मागणी थळावे पंच उदय मांद्रेंकार हांणी केल्या. वयल्या वाठारांत उदक हालींसराक केन्नाच येवंक ना. सकयल्या वाठारांत केन्ना तरी आठ धा दिसांनी उदक येता. सरकारान आमकां फुकट उदक दिनासतना नेमान वा एका दिसा आड तरी उदक दिवचें, अशी मागणी ह्या वाठारांतल्या बायलांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
