भांगरभूंय | प्रतिनिधी
५ जानेवारी मेरेन निर्णय घेवचो, ना जाल्यार करतले आंदोलन
पेडणें: आदले मुख्यमंत्री प्राचार्य लक्ष्मीकांत पार्सेकार हांणी तुयेंची नवी हॉस्पिटल इमारत १०० खाटींचे हें हॉस्पिटल बांबोळे हॉस्पिटलाक लिंक करपाचे नदरेन उबारिल्लें. त्या हॉस्पिटलांत तुयें सामुदायीक केंद्र स्थलांतरीत जालें, जाल्यार खर आंदोलन करतले. ५ जानेवारी मेरेन सरकारान फेरविचार करून हें हॉस्पिटल लिंक हॉस्पिटलूच करचें. ना जाल्यार १२ जानेवारी सावन सांखळे उपोशणाक बसतले अशी शिटकावणी तुयें हॉस्पिटल कृती समितीन लेखी निवेदन भलायकी अधिकारी हांकां सादर करतना दिली.
ह्या वेळार समितीचे जॉर्ज लोबो, देवेंद्र प्रभू देसाय, अॅड, प्रसाद शहापूरकार, पेडणें म्हाल विकास समितीचे निमंत्रक व्यंकटेश नायक, पंच निलेश कांदोळकार आनी हेर हाजीर आशिल्ले.
ह्या वेळार देवेंद्र प्रभूदेसाय हांणी उलयतना सांगलें, ज्या हेतान ही हॉस्पिटलाची इमारत उबारिल्ली ते प्रमाण हांगा लिंक हॉस्पिटल सुरू करचें. तें अजूनय सुरू करूंक ना. जर तुये सामुदायीक भलायकी केंद्र ८० कोटींचे इमारतींत स्थलांतरीत करपाचो यत्न जाल्यार हाका आमचो खर विरोध आसा. हे खातीर आमी भलायकी अधिकार्यांक लेखी स्वरूपात निवेदन सादर केलां. ह्या नव्या हॉस्पिटलांत ओपीडी, फार्मसी लॅबोरेटरी हे विभाग स्थलांतरीत करून सरकार लोकांक फटयता कितें, असो प्रस्न तांणी केलो.
हें शंभर खाटांचे तुयें हॉस्पिटल बांबोळी हॉस्पिटलाक लिंक जावचें. हे खातीर लक्ष्मीकांत पार्सेकार हांणी इमारत उबारली. येवजण्यो राबयल्यो. सरकारान तुयें सामुदायिक भलायकी केंद्राचें सोबितीकरण करतना ताचो विस्तारूय करून करोडांनी रुपया खर्च केल्यात. तेंच हॉस्पिटल आतां नवे इमारतींत स्थलांतरीत करपाचो डाव जनता उक्तडार हाडटली अशेंय तांणी सांगलें. हे विशीं जर पाच जानेवारी मेरेन फेरनिर्णय घेतलो ना जाल्यार आमचो हाका खर विरोध आसतलो. जनतेक रस्त्यार येवचें पडटलें, अशी शिटकावणी देवेंद्र प्रभूदेसाय हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
