भांगरभूंय | प्रतिनिधी
तुयें हॉस्पिटल नागरिक समितीन घेतली भलायकीमंत्री विश्वजीत राणे हांची भेट
पेडणें: तुयेंच्या हॉस्पिटलांचे बेगोबेग उक्तावण करून लोकांची वेवस्था करची अशे तरेचे मागणेचें निवेदन तुयें हॉस्पिटल नागरीक समितीच्या वतीन शुक्रारा भलायकीमंत्री विश्वजीत राणे हांकां दिलें.
ह्या वेळार पेडणें मतदारसंघाचे आमदार प्रवीण आर्लेकार हेय हजर आशिल्ले. तशेंच दिवचल मतदारसंघाचे आमदार डॉक्टर चंद्रकांत शेट्ये, तुयें हॉस्पिटल नागरीक समितीचे पदाधिकारी निमंत्रक जोसे लोगो, भास्कर नारुलकार, तुळशीदास रावत, रोहिदास हरमलकार , भलायकी खात्याचे अधिकारी हजर आशिल्ले.
तुयेंच्या हॉस्पिटलाचें काम सध्या सुरू आसा. हें काम बेगोबेग पुराय करून हें हॉस्पिटल जनते खातीर उक्तें करचें अशी मागणी केली.फाटले जायते म्हयने ही मागणी तुयें हॉस्पिटल समिती वतीन जाता. हे खातीर पेडणें म्हालांत जागृताय केल्या. जायत्यो पंचायती, समाजीक संस्था तशेंच विवीध संस्थांक भेटी दिवन, हे संबंदी चळवळ करतात. हे चळवळींत जायत्या पक्षांचे फुडारी तशेंच सरपंच, आदले-आतांचे पंचायत वांगडी तशेंच लोकप्रतिनिधी हांचोय आसपाव आसा. फाटल्या कितल्याशाच वर्सां सावन ह्या हॉस्पिटलाचें काम आडकून आसा. सरकारान आतां मेरेन हे इमारतीचेर करोडांनी पयशे खर्च केल्यात. मात तें आजनय थळाव्या लोकां खातीर उक्तें करूंक ना. हें हॉस्पिटल बेगोबेग सुरू जावचें आनी पेडणेंच्या लोकांची वेवस्था जावची हे खातीर तुयें हॉस्पिटकृती समितीन चळवळ उबारल्या. आतां मेरेन हे चळवळीक बरो प्रतिसाद मेळटा. आदले मुख्यमंत्री आनी भलायकी मंत्री लक्ष्मीकांत पार्सेकार हांकां हें हॉस्पिटल बरेंच व्हड बांदपाचें आशिल्लें. हेच फाटभूंयेर काम फुडें गेल्लें. फाटल्या पांच-स वर्सां सावन हें काम कांसवाचे गतीन जाता. हें हॉस्पिटल आतां तरी पुराय करचें अशें हांगचे जनतेनूच चळवळ सुरू केल्या. हाका लागू भलायकी मंत्री विश्वजीत राणे हांची तांणीभेट घेवन तुयेंचे हॉस्पिटल कृती समितीन निवेदन सादर केलें आनी हें हॉस्पिटल जीएमसी सारकेंच चलचें आनी बेगबेग सुरू करचें अशी मागणी केल्ल्याची म्हायती कृती समितीचे जुझे तशेंच भास्कर नारुलकार, रोहिदास हरमलकार आनी हेर पदाधिकार्यांनी केल्ल्याची म्हायती दिली.
भलायकी मंत्री विश्वजीत राणे हांणी आपूण हातूंत विशेश लक्ष घालून, हे हॉस्पिटल बेगीनूच तयार करतलों. तशेंच फुडलेय सोपस्कार बेगीनूच पुराय करतलों, अशें आस्वासन तांणी कृती समितीक दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
