भांगरभूंय | प्रतिनिधी
कृती समिती : अर्थसंकल्पांत उक्तावणाची तारीख जाहीर करची
पेडणें ः तुयेंचें भलायकी केंद्र स्थलांतरीत करपाक वा पीपीपी तत्वाचेर चलोवपाक दिवपाक आमचो खर विरोध आसा. आमकां जीएमसी कडेन जोडिल्लें 100 खाटांचें हाॅस्पिटलूच जाय, अशी शिटकावणी तुयें हॉस्पिटल कृती समितीन सरकारान दिल्या. मोपा विमानतळा वयल्यान मेळपी येणावळ ह्या कामां खातीर वापरची आनी आदले मुख्यमंत्री मनोहर पर्रीकार हांचें सपन बेगीन पूर्ण करचें, अशी मागणीय समितीन केली.
नियोजीत हाॅस्पिटलाच्या प्रवेश दाराचेरुय घेतिल्ले पत्रकार परिशदेंत समितीचे निमंत्रक जुझे लोबो, वांगडी तुळशीदास राऊत, अॅड. अमित सावंत, अॅड. प्रसाद शहापूरकार, देवेंद्र प्रभुदेसाय, नीलेश कांदोळकार, भास्कर नारुलकार, व्यंकटेश नायक हे हाजीर आशिल्ले.
जुझे लोबो हांणी सांगलें ः पर्रीकार आनी लक्ष्मीकांत पार्सेकार हांच्या काळांतलो हो प्रकल्प सध्याच्या सरकारान तसोच दवरला. भलायकी मंत्री, थळावे आमदार, मुख्यमंत्री हांकां परत परत सांगून पळयलें, पूण कांयच जावंक ना. 28 जुलय 2022 दिसा ही समिती स्थापन जाली. तेन्ना सावन आमी प्रयत्न करीत आसात, पूण सरकार कांयच हालचाल करीना. ह्या इमारती खातीर 80 कोटीं वयर खर्च जाला. हो लोकांचो पयसो फाटलीं कितलींशीच वर्सां असो आडकून उरला.
समितीच्या हेर वांगड्यांनी सांगलें ः फाल्यांच्यान सुरू जावपी अर्थसंकल्पांत ह्या प्रकल्पा खातीर तरतूद करची. म्हणटकच तारीख पे तारीख दिवची पडची ना. मोपाच्या माध्यमांतल्यान सरकार कोट्यांनी रुपया येणावळ मेळटा, म्हणटकच पेडणेंकारांचे भलायके खातीर सरकारान खेळचें न्हय. पार्सेंचे भगवती देवीक मुख्यमंत्री आनी पेडण्याचे भगवती देवीक भलायकी मंत्री मानतात, म्हणकच तांणी हो हाॅस्पिटल प्रकल्प पूर्ण करून गरिबांचेय आशीर्वाद घेवचे.
खंयचेच परिस्थितींत आमी हो प्रकल्प भायल्या कोणाक चलोवपाक वा स्थलांतरीत करपाक दिवचे नात. तो जीएमसी कडेनूच जोडचो, अशी मागणी समितीच्या वांगड्यांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
