भांगरभूंय | प्रतिनिधी
पेडणेंः पेडणें तालुक्या खातीर राज्य सरकारान खूब महत्वाकांक्षी पावल उबारलां. तुयांच्या शंबर खाटींच्या सरकारी हॉस्पिटलाच्या कार्यक्षेत्रांत बेगीनूच वैजकी म्हाविद्यालय स्थापन करतले अशें मुख्यमंत्री डॉ. प्रमोद सावंत हांणी जाहीर केलें. हो निर्णय पेडणें तालुक्यांतल्या भलायकी सुविधांचो दर्जो सुदारतलोच, तेच बरोबर थळाव्या तरणाट्यां खातीर वैजकी शिक्षणाचीं दारां उक्तीं जातली.
डॉ. सावंत हांणी हे संबंदी म्हायती दितना सांगलें, तुयां हॉस्पिटल आतां ‘गोंय वैजकी म्हाविद्यालय’ (जीएमसी) कडेन लिंक जाला आनी आयच्यान हांगा ओपीडीच्यो सेवा सुरु जाल्यात. हो वाठार आनीक वाडोवन थंय आधुनीक वैजकी म्हाविद्यालय सुरू करपाचे आसात. पेडणे तालुक्याच्या लोकांच्या दारांत तज्ञ दोतोरांची सेवा मेळची आनी विद्यार्थ्यांक शिक्षणा खातीर पयस वच्चें पडचें न्हय हो हाचे फाटलो मुखेल हेत आसा. तुयां हॉस्पिटलांत सध्या 13 वेगवेगळ्यो ओपीडी सुरु आसात. तातूंत वैजकी, शस्त्रक्रिया, आर्थोपेडिक्स, स्त्रीरोग आनी बालरोग ह्या सेवांचो आस्पाव आसा.
थळाव्या उदरगतीक गती मेळटली
पेडणें तालुक्याची नेटान उदरगत जायत आसतनाच मोपा विमानतळ आनी आयुश हॉस्पिटल उपरांत आतां हें वैजकी म्हाविद्यालय तालुक्यांच्या उदरगतींत एक म्हत्वाची गजाल. ह्या प्रकल्पाक लागून पेडणें तालुक्याच्या भलायकी आनी शिक्षणीक उदरगतीक व्हड चालना मेळटली अशें मुख्यमंत्र्यान सांगलें. ह्या निर्णयाक पेडणेंकारांनी येवकार दिलां. फाटली जायतीं वर्सां प्रलंबीत आशिल्लो तुयां हॉस्पिटलाचो प्रस्न आतां पुरायपणान सुटावो जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
