भांगरभूंय | प्रतिनिधी
पेडणें: हालींसराक रानां कुशीक आशिल्ल्या गांवांनी बिबटे, रानदुकर, गवे दिसपाक लागल्यात. गर्मेक लागून तांकां तान लागता, खावपाक कांय ना. म्हणून भुकेक लागून ते लोकवस्तींनी येतात. फाटल्या कितल्याशाच म्हयन्यां सावन तुयें पंचायत वाठारांत बिबट्याक लागून भंयाचें वातावरण पातळिल्लें. तांणी जायत्या घरांतल्या सुण्यांक, माजरांक खाल्लीं. तशेंच्या गायेच्या वासरांकूय तांणी खाल्ल्यान ह्या सगळ्या वाठारांत भंय निर्माण जाल्लो.
ह्या बिबट्याचो बंदोबस्त रान खात्यान करचो हाका लागून लोक मागणी करताले. ते प्रमाण रान खात्यान तुयेंच्या कृष्णा नायक हांच्या घरा लागसारा पांजरो घालो. तातूंत काल रातीं हो बिबटो आडकलो. रान खात्याच्या ह्या येसाक लागून हांगाच्या लोकांनी समाधान उक्तायलां. मात ताका खंय व्हरून सोडटले. सोडटकच तो परत येवचो ना मूं, हाचो लोकांक भंय दिसपाक लागला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
