भांगरभूंय | प्रतिनिधी
पेडणें: चावडेवाडो, पार्शेंच्या अंकुश नागवेंकार (४५) हाका गोमेकाँत मंगळारा मरण आयलें. आयतारा २१ डिसेंबराक तांकां तुयें हॉस्पिटला सामकार गंभीर अपघात जाल्लो. तांचेर उपचार चालू आशिल्ले.
अंकुश हे पेडण्यां रावताले. तांचें मूळ घर चावडे वाडो, पार्श्यां. तांच्या पुताक पेडणें म्हाल मर्यादीत चॅस सर्तींत पयलें इनाम फावो जाल्लें. तें आवयक दाखोवपा खातीर आनी आशिर्वाद घेवपा खातीर ते पार्श्यां आपल्या मूळ घरा गेल्ले. थंयच्यान पेडण्यां परततना तांकां अपघात जालो. तांचो पूत तांचे वांगडा दुचाकी फाटल्यान बशिल्लो. तुयां हॉस्पिटलां मुखार पावतांच तांकां मुखार हेडगीं गोरवां आशिल्ल्याचें लक्षांत येवंक ना. एका गोरवाक धपको दिले उपरांत अंकुश हे एके वटेन जाल्यार दुसरे वटेन तांचो पूत उसळून रस्त्यार पडले. तेन्ना तांचे फाटल्यान एक चारचाकी येताली, ते चारचाकी पोंदाक अंकुश चिड्डलो आनी गंभीर जखमी जालो.
३० तारखेर थळावे मसंडभूंयेत तांचे कुडीचेर निमणे संस्कार जाले. तांचे फाटल्यान घरकान्न, एक पूत आनी अशोक, प्रमोद, दीपक, राम आनी लक्ष्मण हे पांच भाव आसात. तांच्या मरणान पुराय वाठारांत दुख्ख पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
