भांगरभूंय | प्रतिनिधी
गरजेचे परवाने नाशिल्ल्याचें उपजिल्होधिकाऱ्याचें रजांव
भांगरभूंय । प्रतिनिधी
पेडणें : पार्सेच्या कांय तरणाट्यांनी एकठांय येवन श्री सांतेरी भगवती कला आनी सांस्कृतीक मंडळांनी ‘अभंग रिपोस्ट’ ही सांस्कृतीक कार्यावळ तुयेंच्या रैना मैदानाचेर आयोजीत केल्ली. ताका परवाने नाशिल्ल्यान उपजिल्होधिकाऱ्यान ती रद्द केली. तशें आसा जाल्यार दर्यादेग वाठारांत रातीर- मध्यानरातीर, फांतोडे मेरेन वाडपी आवाजाचें प्रदुशण करपी संगीत पार्ट्यांक कोण परवानगी दिता? बेकायदो चलिल्ल्यो धिरयो, जुगार हाका परवाने आसात? मागीर ते बंद कित्याक करिनात, अशे प्रस्न पार्सेचे आदले सरपंच देवेंद्र प्रभुदेसाय हांणी उपस्थीत केले. तुयें ‘अभंगवाणी अभंग रिपोस्ट’ हे सांस्कृतीक कार्यावळीचे सुवातेर ते पत्रकारां कडेन उलयताले.
ह्या वेळार मांद्रें गट काँग्रेस अध्यक्ष नारायण रेडकार, तुयेंचे थळावे पंच उदय मांद्रेंकार हाजीर आशिल्ले.
संस्कृतीची राखण करपी एके व्हड कार्यावळीचें आयोजन केल्लें. हजारांनी संख्येन संगीत मोगी उपस्थीत आशिल्ले. एक बरी कार्यावळ ग्रामीण वाठारांत आयोजीत करून संस्कृतीक चालना दिवपी परवाने नाशिल्ल्यान रद्द जाली, ही एक वायट गजाल जाली. ही कार्यावळ सुरू जावचे आदीं घडणुकेचे सुवातेर व्हड संख्येन पुलीस आशिल्ले. तांणी आयोजकांक सुरवातीकूच वेगवेगळे परवाने गरजेचे आसात, हाची म्हायती कित्याक दिवंक ना, असोय प्रस्न प्रभुदेसाय हांणी उपस्थीत केलो. नारायण रेडकार हांणी सांगलें, सांस्कृतीक कार्यावळ अचकीत रद्द केल्ल्यान आपूण ताचो निशेध करता. सांस्कृतीक कार्यावळीक सगल्यांनी, राजकारण्यांनी लेगीत तेंको दिवपाची गरज आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
