भांगरभूंय | प्रतिनिधी
नवी दिल्लीः तुमी सिगरेट ओडटात आनी 20 रुपयां परस उण्या मोलाचो पॉकेट लायटर वापरतात जाल्यार ही तुमचे खातीर म्हत्वाची खबर. केंद्र सरकारान सिगरेट लायटराच्या आयात धोरणांत व्हड बदल करपाचो निर्णय घेतला. 20 रुपया सकयल्या दराच्या सगळ्या प्रकारच्या लायटरांचे आयातीचेर बंदी घालपाचो निर्णय केंद्रान घेतला. पयलीं ह्या लायटरांचो ड्यूटी फ्री वर्गांत आस्पाव जातालो. आतां हो लायटर तातूंतल्यान काडून प्रतिबंधीत वर्गांत दवरला म्हणून तो आयात करपाक मेळना.
सरकाराच्या ह्या निर्णयाक लागून सिगरेट व्यसनींक खर मार बसतलो. देशांत ड्रग्स व्यसनींचो आंकडो दिसान दीस वाडत आसा. हें मतींत दवरून सरकारान 20 रुपया सकयल्या सगळ्या प्रकारच्या लायटरांची आयात करपाचेर बंदी घाल्या. हे संबंदी केंद्र सरकारान अधिसुचोवणी जारी केल्या. पूण लायटराची सीआयएफ म्हळ्यार खर्च, विमो आनी मालवाहतूक 20 रुपया परस चड आसल्यार हे लायटर आयात करूं येतात.
भायल्या देशांतल्यान आयात केल्ल्या वस्तूंचो वट्ट खर्च थारावपा खातीर सीआयएफचो उपेग करतात. पॉकेट लायटर, गॅस लायटर, रिफिल करपाक येवपी वा रिफिल करपाक मेळना त्या लायटरांचेर बंदी आसा. पॉकेट, गॅस लायटर, रिफिल करपाक येवपी वा नॉन रिफिल करपाक येवपी लायटरांची आयात 2022-23 वर्सा 6.6 दशलक्ष डॉलर आशिल्ली. चीन, स्पेन, तुर्कस्तान आनी संयुक्त अरब अमिरातींत आयात करतात.
फाटल्या वर्सा तमिळनाडूचे मुख्यमंत्री एम. के. स्टालिनानय सरकाराक पत्र बरयल्लें. पर्यावरणाची राखण करपा खातीर सिंगल युज प्लास्टीक लायटरांचेर बंदी घालची अशें तांणी पत्रांत बरयलां. दक्षीण भारतांत चडशे लोक फस्कां करून आपलें पोट भरतात. उण्या मोलाच्या लायटरांचेर बंदी घालल्यार दक्षीण भारतांतल्या फस्क निर्मात्यांक फायदो जातलो अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
