भांगरभूंय | प्रतिनिधी
मुख्यमंत्रीः एकदां गेल्ली संद परतून येना हे समजून घेयात
भांगरभूंय । प्रतिनिधी
पणजीः गोंयांतल्या तरणाट्यांक सगळ्याच मळांचेर नेतृत्व करपाची संद आसा. ती घेतली ना जाल्यार फुडल्या धा वर्सांत हेर राज्यांतले व्यक्ती ह्यो संदी घेतले, अशें मुख्यमंत्री डॉ. प्रमोद सावंत हांणी सांगलें. सोमारा गोंय विद्यापीठ आनी उच्च शिक्षण खात्या वतीन आयोजीत यंग लिडर काँक्लेव्ह हे कार्यावळींत उलयताले. ह्या वेळार खात्याचे संचालक भूषण सावयकार, अभाविपचे राष्ट्रीय संयोजक डॉ. विरेंद्र सोळंकी, विद्यार्थी परिशदेचे अंशूल सिनारी आनी विनय राऊत हाजीर आशिल्ले.
मुख्यमंत्री डॉ. सावंत हांणी सांगलें, गोंयांत सध्या विवीध मळांचेर बऱ्यो संदी आसात. मात फकत सरकारी नोकरी जाय ह्या हट्टाक लागून ह्यो संदी घेनात. अभियंतो जाल्ली व्यक्ती एलडीसीची नोकरी मेळटली हे आशेन घरा बसून आसा. एकदां गेल्ली संद परतून येना हें समजून घेवपाक जाय. तुमी जर संद घेतली ना जाल्यार हेर राज्यांतल्यो व्यक्ती हांगा येवन त्यो संदी घेतल्यो. अशेंच जायत रावलें जाल्यार फुडल्या 10 वर्सांत गोंयांतल्यो संदी सोंपतल्यो. हे खातीर गोंयांतल्या तरणाट्यांनी आतां सावनूच यत्न करपाक जाय.
आतां जाल्यार गोंयांत गोंया भायले एनजीओ लेगीत काम करतात. एनजीओ मळार बरो निधी मेळटा. अश्या गोंयकारांनी स्वताची एनजीओ सुरू करची. तरणाट्यांनी नेतृत्व गूण विकसीत करप गरजेचें आसा. व्यक्तीमत्व विकास, माचयेर उलोवप, सगळ्यांक घेवन मुखार वचप अशें गूण विकसीत करचे. स्वताक विकसीत केले जाल्यारूच तुमचो गांव, राज्य आनी देश विकसीत जातलो. बरो फुडारी हो केन्नाच स्वकेंद्रीत आसना. ताका आपल्या सरभोंवतणी कितें चल्लां वा सामान्य ज्ञान आसप गरजेचें आसा. बरें नेतृत्व हें जल्माक येना जाल्यार तें विकसीत करचें पडटा, अशें मुख्यमंत्र्यान सांगलें. कांय लोक आपूण फुडारी म्हूण देशभर भोंवतात. फकत दरेका भाशणांत पुस्तक दाखयलें म्हणून लेगीत फुडारी तयार जायना. बऱ्या नेतृत्वान सगळ्यांचें म्हणणें आयकून घेवपाक जाय, पुस्तकां वाचपाक जाय. अशें जालें जाल्यारूच ती व्यक्ती बरो फुडारी जावपाक शकता. आयच्या तरणाट्यांनी 80 हजारांचें बूट वा एका लाखाचें घड्याळ अश्या गजालीं कडेन लक्ष दिवचें न्हय. सगळ्यांनीच शारिरीक आनी मानसीन नदरेन तंदुरुस्त आसप गरजेचें आसा, अशें मुख्यमंत्री डॉ. सावंत हांणी सांगलें.
आळसायेची मानसिकता सोडची
पुर्तुगेजांनी 450 वर्सांच्या काळांत गोंयकारांक आळशी करून दवरले. गोंयकार म्हणल्यार सुसेगाद अशी वळख जाल्या. आमी पिळग्यान पिळग्यो आळसायेचे मानसिकतायेंत आडकून उरल्यात. तातूंतल्यान भायर सरचे कातीर आमी कामांत व्यस्त रावप गरजेचें आसा. तुमी जेन्ना ‘बिझी’ आसतात तेन्ना तुमी ‘लेझी’ आसनात, अशें मुख्यमंत्री डॉ. प्रमोद सावंत हांणी सांगलें.
गोंयांत धांवतली मॅट्रो रेल्वे
मॅट्रो रेल्वे प्रकल्पा संबंदांत नियोजनाच्या पांवड्यार काम चल्लां. हे विशीं आमी प्रस्ताव तयार करतात. तशेंच भारतीय रेल्वे आनी हेर केंद्रीय खात्यां वांगडा चर्चा चल्ल्या. फुडल्या कांय काळांत मॅट्रो रेल्वे गोंयांत येतली, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
