भांगरभूंय | प्रतिनिधी
सद्या वायट जिणे पद्दतीक लागून केंस गळप, डँड्रफ, केंस धवे जावप अशे प्रस्न उप्रासतात. केंसां कडेन संबंदी अश्यो जायत्यो समस्या सध्या तरणाट्यां मदीं दिसतात. तांचो फकत आमचे सोबीतकायेचेरूच न्हय तर आमच्या आत्मविस्वासाचेरूय परिणाम जाता. पूण केंस वचपाचीं मुखेल कारणां म्हणल्यार हार्मोनां मदीं बदल, ताण आनी आहारांत उणाव हीं आसतात.
दाट केंसां खातीर लोक जायते उपाय करतात. कांय जाणां रसायनीक उपचार लेगीत करतात. पूण केन्ना केन्नाय ह्या उत्पादनांचे वायट परिणामूय सोंसचे पडटात. केंस वाडपाक कांय आयुर्वेदीक उपाय खूब फायद्याचे आसतात अशें आयुर्वेदीक तज्ञ सांगतात.
आयुर्वेदीक उपाय
शिरोधारा: शिरोधार ही पारंपारीक आयुर्वेदीक उपचार पद्दत. हातूंत तेल ल्हव ल्हव तकलेक सोडटात. हातूंत ताण उणो करपा वांगडाच केंसांचीं मुळांय घट जातात. पूण ही उपचार पद्दत आयुर्वेद तज्ञाच्या देखरेखीखालाच करात. ताणाक लागून जांचे केंस वतात, तांचे खातीर हो उपाय खूब फायद्याचो थारता.
शिरो अभ्यंग: म्हळ्यार तकलेक मालीश करप. भृंगराज आनी आवाळे अश्या हर्बल तेलांनी तकलेक मसाज केल्यार खूब फायदो जाता. हाका लागून केंस चकचकतात आनी मुळाय घट्ट जातात. केस गळती जाता जाल्यार सप्तकांतल्यान दोन फावटीं भृंगराज आवाळाच्या तेलान तकलेक मसाज करात. अशें केल्ल्यान केंस गळपाचे थारतले.
नस्य कर्म: हो नाका संबंदीचो उपचार. हातूंत अणु तेल वापरतात. नस्य शरीरांतले दोश संतुळीत करपाक मजत करता. हाका लागून केंसूय बरे जातात. आयुर्वेद तज्ञांचो सल्लो घेवनूच ते प्रमाण सद्दां सकाळीं नाकांत अणु तेलाचे २ ते ३ थेंब घालात. हाका लागून केंसांचीं मुळां घट्ट जातात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
