भांगरभूंय | प्रतिनिधी
गिमाच्या उश्ण दिसांनी सदचे परस चड घाम येवप हें सामान्य आसा, कारण कुडीक थंड करपाचो हो एक मार्ग. पूण कांय जाणांक खूब घाम येता. तांकां सेगीत कुड पुसची पडटा, घाण वास येता आनी तशेंच सादें काम करतना लेगीत भरपूर घाम येता. तशें आसल्यार तुमकां हायपरहाइड्रोसिस दुयेंस आसूं येता. हाचो अर्थ तुमच्या कुडींतल्यो घामाच्यो ग्रंथी चड सक्रिय आसतात.
घामाच्यो ग्रंथी म्हणल्यार कितें?
आमचे कुडींत दोन प्रकारच्यो घामाच्यो ग्रंथीं आसतात. पयलीं म्हळ्यार एक्रीन ग्रंथी जी कुडीच्या चडशा केंस नाशिल्ल्या भागांचेर आसता. जशे ताळयो, तळवे, तळहात आनी कपल. दुसरी एपोक्राइन ग्रंथी जीं केंसांच्या कुपालागीं आनी चड करून माथ्याची कात सारकिल्ल्या भागांचेर आसता. एक्रीन ग्रंथींतल्यान भायर सरपी घामांत 90 टक्क्यां परस चड उदक आसता आनी उरिल्लें मीठ. एपोक्राइन ग्रंथींतल्यान भायर सरपी स्राव चड करून चिकट आसतात, तातूंत उदक प्रथिनां आनी पोशक तत्वां आसतात. बॅक्टेरिया आशिल्ल्या कातींच्या भागात घाम येता आनी ताका लागून कुडीक वास येता.
चड घाम येवपाचीं कारणां कितें?
ज्या लोकांक घामाच्या ग्रंथींचो आंकडो आनी आकार सामान्या परस चड आसता, तांकां मुखेलपणान चड घाम येता. देखून मात्सो परिणाम जाल्यार लेगीत ह्यो ग्रंथी चड सक्रिय जावन भरपूर घाम येवंक शकतात. उश्ण, दमट तापमान, खर व्यायाम वा शारिरीक क्रियाकलाप, हार्मोनल असंतुलन, खास करून रजोनिवृत्तीच्या काळांत बायलां मदीं थायरॉयडाची समस्या, एपिडर्मिसांत रगत प्रवाह वाडिल्ल्यान अशें जाता. हाका लागून कात तांबडी जावप, ताण आनी चिंता अश्यो समस्या उप्रासतात. कांय वखदांचो दुश्परिणामाक लागूनूय केन्ना केन्ना चड घाम येता.
घामाचें प्रमाण तुमच्या कुडीच्या आकाराचेर आनी स्नायूंच्या द्रव्याचेरूय आदारून आसता, जाका लागून चड उश्णताय निर्माण जाता आनी ताका लागून चड घाम येता.
समस्येची खात्री कशी करूं येता?
स्टार्च आयोडीन चांचणी आसता, तातूंत घामाच्या वाठारांत आयोडीनाचें द्रावण लायतात आनी ताचेर स्टार्च शिंपडटात. ताका लागून घामाचे चड दाग निळे जातात. तशेंच घामाच्या ग्रंथींच्या सुवातेर पेपर सोक्स आनी गरत इमेजिंग चांचणी आसात.
कुडीक घाण कित्याक येता?
घामाक लागून कुडीक वास येना, जाल्यार घामांतल्या बॅक्टेरियाक लागून घाण येता. तुमी भायर चड काळ काम करतात जाल्यार कपडे बदलपाची गरज आसूं येता. पांयतणां आनी मोजे बदलात, मसाल्याच्या खाणाचो वापर उणो करात आनी उदक चड पियेवप. शक्य जाल्यार एका परस चड फावटीं न्हावचें.
केन्ना केन्ना दोतोर घाम नियंत्रीत करपाक वखदां आनी सुरक्षीत डिओडोरंट्स वा अँटीपर्सपिरंट्स वखदां दिवंक शकता. रातच्या वेळार न्हिदतना प्रिस्क्रिप्शन ग्रेड डिओडोरंट लावंक शकता. हाका लागून घाम नियंत्रणांत दवरूं येता. तशेंच घाम सोंसपी कपडे घालचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
