भांगरभूंय | प्रतिनिधी
पेडणें : ‘तुकां मायकल लोबो जाय?’ अशें म्हणीत पांच गुंडांनी तोंडाक बुरखो बांदून आदले सरपंच महेश कोनाडकार हांचेर खुनी हल्लो करपाची घडणूक बुधवारा आस्काववाडो, मांद्रें मठा लागसारा घडली. हाचे उपरांत तांकां रोखडेच तुयें हॉस्पिटलांत उपचारा खातीर व्हेले. थंयच्यान तांकां म्हापशें जिल्लो हॉस्पिटलांत धाडले.
मजगतीं तुयेंच्या हॉस्पिटलांत जखमी अवस्थेंत आशिल्ले कोनाडकार हांची आमदार मायकल लोबो, मांद्रेंचे आदले आमदार दयानंद सोपटे, मांद्रेंचे सरपंच मिगेल उर्फ रोजा फर्नांडीस, आदले सरपंच अमित सावंत, आदले सरपंच प्रशांत उर्फ बाळा नायक, आदले सरपंच प्रदीप हडफडकार, बाबूसो हडफडकार, उपसरपंच तारा हडफडकार, धारगळचे आदले सरपंच भूषण उर्फ प्रदीप नायक, पंच किरण सावंत, सुदेश सावंत, जिल्लो वांगडी सतीश शेटगांवकार, देवेंद्र प्रभुदेसाय आनी हेरांनी येवन विचारपूस केली.
२४ वरां भितर हल्लो करपी पांचूय जाणांक हाडचें आनी तांणी कोणें हल्लो करपाक लायिल्ल्याचें सांगचें. २४ वरां भितर कारवाय जावंक ना, जाल्यार आमी मुख्यमंत्र्यांच्या बंगल्या मेरेन वचून जाप मागतले, अशें मांद्रें पंचायत मंडळान जाहीर केलां. आमदार मायकल लोबो हांणी हें प्रकरण क्रायम ब्रांच कडेन दिवचें अशी मागणी केली.
लोबो हे मांद्रेंच्या सप्तकाक आयिल्ले. तेन्ना तांचे सयत एका टी स्टॉलार च्या घेवपा खातीर महेश कोनाडकार, प्रशांत उर्फ बाळा नायक हे बशिल्ले. अदीं मदीं मायकल लोबो हे मांद्रें मतदार संघांत वेंचणुकेक उबे रावतले अशी चर्चा चलता. ताचोच राग कोणें तरी कोनाडकार हांचेर हल्लो करीत काडला आसतलो अशी शक्यताय आसा.
प्रकरण क्रायम ब्राची कडेन दिवचें
लोबो हांणी जखमी कोनाडकार हांची खबर घेतली. तेन्ना थळाव्या पत्रकारां कडेन उलयतना तांणी सांगलें, हो सामको निर्दयी प्रकार जावन आसा. आदीं असले प्रकार आमी केन्नाच पळोवंक नात. अश्यो घडणुको ह्या राज्यांत घडनाशिल्ल्यान जो कोण दोशी आसात तांचेर खर कारवाय करची. हें प्रकरण क्रायम ब्रांच कडेन दिवचें, अशी मागणी हांव मुख्यमंत्री प्रमोद सावंत हांची भेट घेवन करतलों.
हें जांणी केलां तें सामकें चुकीचें जावन आसा. पांच जाण येवन लोखणाच्या रोडान हल्लो करप योग्य न्हय. ही लोकशायेचो खून जावन आसा असो दावो आमदार लोबो हांणी केलो.
वळख पुलिसांनी पटोवची
तोंडांक मास्क घालून लोखणाच्या वारावान हल्लो करपी जे कोण आसात तांकां पुलिसांनी रोखडीच अटक करची अशी मागणी लोबो हांणी केली. कोनाडकार हांची भेट घेवपा खातीर जे आमदार, सरपंच, पंच आनी हेर बरें मागपी हॉस्पिटलांत आयिल्ले तांणी दुबावितांक अटक करपाची मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
