भांगरभूंय | प्रतिनिधी
पायलटांचो संवाद, अहमदाबाद विमान दुर्घटनेचो अहवाल सादर
अहमदाबाद, खबरां संस्था ः लंडनाक वचपी एअर इंडियाचें विमान 12 जुनाक अहमदाबादच्या सरदार वल्लभभाई पटेल आंतरराष्ट्रीय विमानतळा वयल्यान उडले उपरांत कांय वेळातच हॉस्टेलाचे इमारतीचेर कोसळ्ळें. ह्या अपघातांत वट्ट 260 जाणांक मरण आयलें. अपघाता उपरांत केंद्र सरकारान रोखडोच उच्च पांवड्यार चवकशी करपाचो आदेश दिलो.
एका म्हयन्या उपरांत मुळावो तपास अहवाल आयलां. एअरक्राफ्ट अॅक्सिडेंट इन्व्हेस्टिगेशन ब्युरोन (AAIB) 15 पानांचो अहवाल सादर केलो. तपासा प्रमाण, उड्डाणा उपरांत दोनूय इंजिनां बंद पडलीं आनी विमान नियंत्रणा भायर गेलें आनी सकयल येवन क्रॅश जालें. कॉकपिटांतल्या पायलटां मदीं जाल्लो संवादूय मुखार आयलो.
ह्या अहवाला प्रमाण, विमानाच्या इंजिनांक इंधन (फ्युयल) पुरवण करपी, ताचेर नियंत्रण दवरपी स्वीच बंद जाल्ल्यान हो अपघात जालो. उड्डाण जाले उपरांत तीन सेकंदां भितर दोनूय इंजिनांची इंधन पुरवण बंद जाली. ताका लागून विमान कोसळ्ळें. पायलट आनी सह-पायलट हांचे मदल्या संवादांतल्यान हें स्पश्ट जाता. म्हत्वाचें म्हणल्यार एअर इंडियान 2018 वर्साच्या एफएए मार्गदर्शक तत्वां कडेन दुर्लक्ष केल्ल्यान हो अपघात जाला अशेंय चवकशी अहवालांतल्यान स्पश्ट जालां.
पायलटां मदीं जाल्लो संवाद…
उड्डाणा उपरांत कांय सेकंदां भितर इंधन ‘कटऑफ स्वीच’ सुरु जालो. ताका लागून पायलटान सह-पायलटाक विचारलें, “आरे, तुंवें इंधन कित्याक बंद केल्लें?” ताचेर सह-पायलटान जाप दिली, “ना रे, हांवें कांयच करुंक ना.” हो संवाद कॉकपिटांत रेकॉर्ड जाला. इंजिन बंद जाल्ल्यान रॅम एअर टर्बायन (RAT) आपोआप सुरू जालें. पूण इंजिन परतून सुरू करपाचो यत्न अपेशी थारलो अशें अहवालांत म्हणलां.
हाचे वयल्यान पायलटान इंधन बंद करूंक नाशिल्लें हें स्पश्ट जाता. मागीर दोनूय इंजिनांचें इंधन एकाच वेळार बंद कशें जालें हो प्रस्न उप्रासता. इंजिन 1 आनी इंजिन 2 हांकां इंधन दिवपी स्वीच बंद जाले उपरांत इंधन भितर वचपाचें बंद जालें आनी दोनूय इंजिनां बंद पडलीं, अशें अहवालांत म्हणलां.
विमानाचे फ्लॅप लँडींग गियर आनी थ्रस्ट लीव्हर सामान्य स्थितींत आशिल्ल्याचें अहवालांत म्हणलां. हवामानय नितळ आशिल्लें आनी शेवणी आपटपाची घडणूक घडली ना. इंधनाचे नमुने बरे आशिल्ल्याचें दिसून आयलें पूण अपघाती विमानांत इंधन सामकें उणें मेळ्ळें. 2018 वर्सा एफएएन अशा इंधन नियंत्रण स्वीचांच्या लॉकिंग यंत्रणे विशीं सल्लो जारी केल्लो. पूण एअर इंडियान ही तपासणी केली ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
