भांगरभूंय | प्रतिनिधी
पणजी : चोडण जेटी कडेन सोमारा बुडिल्ली फेरीबोट आयज बुधवारा सावन (२६ जून) उदकांतल्यान भायर काडपाचें काम सुरू जातलें. क्रेन घडणुके सुवातेर पावल्या. बुडिल्ले फेरयेंत आशिल्ल्यो दुचाकी पाणबुड्यांचे मजतीन भायर काडल्यात. आतां पोंटूंत वारो भरून ही फेरीबोट उदकाचेर फ्लोट करतले. उपरांत बोटींत घुशिल्लें उदक उपशितले. क्रेनीचे मजतीन फेरीबोट पुरायेन भायर काडटले.
फेरीबोट बुडपाचें कारण
न्हंय परिवहन खात्याच्या मुळावे म्हायती प्रमाण, संबंदीत फेरीबोटीची जायतीं वर्सां जालीं दुरुस्ती करूंक नाशिल्ली. बोटीच्या पत्र्याचेर कळम आयिल्ल्यान ताका वेर गेल्या. हाका लागून पावसाचे उदक भितर सरतालें आनी कर्मचारी हातांनीच तें उदक भायर काडटाले. २४ जुनाक फेरी यार्डांत व्हरून तिची दुरुस्ती करपाचो निर्णय घेतिल्लो. ताचे पयलींच सोमारा रातीं बोट चोडण धक्या कडेन उबी दवरिल्ले कडेन अचकीत लवंडली आनी उदकांत बुडली.
मजगतीं, मंगळारा बोटीवेल्या कर्मचार्यांच्यो प्रतिक्रिया नोंद करपाचें काम सुरू आशिल्लें. ह्यो प्रतिक्रिया आयज बुधवार मेरेन संबंदीत अधिकार्यांक धाडटले. बोट बुडपा फाटलें नेमकें खंयचें कारण हें कर्मचार्यांनी दिल्ले जापेंतल्यान मुखार येतलें, हाचे कडेन सगल्यांचें लक्ष लागलां.
ही घडणूक जाले उपरांत फेरीबोट वेवस्थापनांतल्या बेजापसालदारपणाचेर परत प्रस्न निर्माण जाता. सदांच शेकड्यांनी प्रवाशांचो प्रवास ह्या मार्गार जाल्ल्यान फुडाराक अशे तरेच्या घडणुको जावच्यो न्हय म्हणून न्हंय परिवहन खात्यान बेगोबेग उपाय काडप सामकें गरजेचें थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
