भांगरभूंय | प्रतिनिधी
पणजी: इन्स्टिट्यूट मिनेझीस ब्रागांझा हे सरकारी संस्थेन राष्ट्रीय पुस्तक सप्तका निमतान काडिल्ली आमंत्रण पत्रिका फकत मराठी भाशेंतल्यानूच काडल्या. ते खातीर कोंकणी भाशा मंडळान निशेद उक्तायला.
राज्य सरकाराच्या कला आनी संस्कृती खात्या वतीन पुरायेन अनुदानीत आशिल्ले हे संस्थेचें काम गोंय सरकारान संमत केल्ल्या राज्यभास कायद्या आड आसा. ताका लागून खात्यान हे घडणुकेची दखल घेवन योग्य ती कारवाय करची अशी मागणी मंडळाचे सरचिटणीस मंगलदास भट हांणी प्रसिद्ध केल्ल्या पत्रकांत केल्या.
कोंकणी ही गोंयची एकूच राज्यभास. तिका दुय्यम थारावपाचो हो प्रकार सोंसनू घेवचे नात. प्रत्यक्ष कारवाय करपाची शिटकावणी तांणी पत्रकांत मुखार दिल्या.
ज्येश्ठ लेखक रवीन्द्र केळेकार आनी मनोहरराय सरदेसाय हांची जल्मशताब्दी मनोवपा संबंदी सरकारान केल्ली घोशणा सरकार विसरलें काय, असो प्रस्न मंडळान केला. सप्तकभर चलपी ह्या सुवाळ्यांत ह्या दोन राष्ट्रीय लेखकांची दखल पसून घेवंक नाशिल्ल्यान मंडळान खंत उक्तायल्या. ह्या जल्मशताब्दी आयोजनाचें स्वरूप सरकारान बेगीनूच घोशीत करपाची मागणी ताणें केल्या.
मजगतीं, राजभाशेची लिपी, शिक्षणांत कोंकणी भाशे विशीं वापरपाची लिपी हे विशीं कोंकणी भाशा मंडळाची भुमिका आदलीच आसा. राजभास कायद्यांत खंयचेच तरेचो बदल करपाक मंडळाचो विरोध आसा. अशे यत्न केल्यार ते पुराय शक्त लावन हुमटावन उडयतले अशी शिटकावणी मंडळान केल्या.
कोंकणीचे विचारवंत दत्ता दामोदर नायक हांणी ‘रोमन कोंकणी आनी मराठी भाशेक राज्यभाशेचो दर्जो दिवपा’ संबंदी उक्तायिल्ले विचार, हें तांचें वैयक्तीक मत. कोंकणी भाशा मंडळ राजभाशे विशींचे आपले भुमिकेवर ठाम आशिल्ल्याचें प्रतिपादन मंडळा वतीन मंगलदास भट हांणी पत्रकांत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
