भांगरभूंय | प्रतिनिधी
पणजीः फाटल्या तीन वर्सां भितर केंद्रांतल्यान गोंयच्या सोसायटींनी ५५ हजार मेट्रीक टन इतलें राशनाचें वाटप जालां. ह्या वर्साच २३ हजार टन इतले वाटप जालां. मजगतीं, प्रधानमंत्री गरीब कल्याण येवजणेच्या लावार्थ्यांचो फाटलीं तीन वर्सां सेगीत आंकडो देंवत आसा, अशी म्हायती केंद्रीय गिरायक वेव्हार, अन्न आनी भौशीक वितरण मंत्री प्रल्हाद जोशी हांणी दिल्या.
लोकसभेच्या पटलार लेखी प्रस्नांक जाप दितना मंत्री प्रल्हाद जोशी हांणी ही आंकडेवरी जारी केल्या. वर्स २०२३ ते २०२५ आतां मेरेन राज्यांतले सोसायटी खातीर ५५,८५८ मेट्रीक टन इतलें राशनाचें वाटप जालां. फकत तांदळाची पुरवण केंद्र सरकारा कडल्यान राज्यांत जाता. गंव आनी हेर कड्डणाचो हातूंत आस्पाव ना. वर्साक सरासरी २९ हजार मेट्रीक टन तांदळाची पुरवण जाता आनी दर वर्सा तांदळाचें प्रमाणात देंवत आसा.
वर्स २०२३त २९,६९० मेट्रीक टन तांदूळ केंद्रांतल्यान आयल्ले, वर्स २०२४त हातूंत कांय प्रमाण देंवून २९,१९३ मेट्रीक टन तांदूळ केंद्राकडल्यान आयले, जाल्यार अंदू २०२५त नोव्हेंबर मेरेन २३,७०५ मेट्रीक टन तांदूळ गोंयां पावल्यात.
मजगतीं प्रधानमंत्री गरीब कल्याण अन्न येवजणेचे लावार्थ्यांत फाटल्या दोन वर्सांच्या काळात २ टक्के देंवल्यात. २०२३त ४.८५ लाख लावार्थी हे येवजणे खाला फुकट राशन घेताले आनी आतां २०२५त १० हजार मेरेन लावार्थ्यांचें प्रमाण देंवून हो आंकडो ४.७५ लाख मेरेन पावला.
गरीब कल्याण येवजणेचे लावार्थी
वर्स – लावार्थी
२०२३ – ४,८५,७५४
२०२४ – ४,७९,०७९
२०२५ – ४,७५,५९४
(आतां मेरेन)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
