भांगरभूंय | प्रतिनिधी
पणजीः हेडगीं गोरवां व्हरपा खातीर जेन्ना गोशाळेचे वावुरपी गोरवां व्हरपाक येतात तेन्ना तांचे धनी तांकां शेपलायतात. देखून हो विशय सोडोवपा खातीर पंचायतींनीं गोशाळे वांगडा कबलात करची आनी हे खातीर आमदारांनी फुडाकार घेवचो. येवपी तीन चार म्हयन्यांनी हो विशय जाग्यार घालतले, अशें मुख्यमंत्री डॉ. प्रमोद सावंत हांणी सांगलें.
वेळ्ळीचे आमदार क्रुझ सिल्वा हांणी हेडग्या गोरवांचो विशय शुन्य प्रहरा वेळार काडिल्लो. कितेलेशेच फावट हो विशय विधानसभेंत काडीत आसा. मात कोणूच हो विशय गंभीर घेनात. ह्या गोरवांक लागून रातचे कितलेशेच अपघात जातात. देखून ही जापसालदाकरी कोणें घेवपाची? असो प्रस्न सिल्वा हांणी केलो.
हे विशीं जाप दितना डॉ. सावंत हांणी सांगलें, सरकारा कडेन स सुवातीचेंर हेडग्या गोरवां खातीर गोशाळा आसात. पंचायतीनी वांगडा आमदारांनी हे गोशाळेकडेन कबलात करची. जर गाडी घेवन गोरवां धरूंक गेल्यार लोक तांकां बडयतात. तेच लोक आपलीं गोरवां रस्त्यार सोडटात आनी तीं धरपाक गेल्यार गोशाळेचे वावुरप्यांक बडयतात. देखून आमी तेंको दिवप गरेजेचें आसा, असो उलो मुख्यमंत्र्यान मारलो.
गोरवांक लागून अपघात जावचे न्हय म्हण येता त्या दोन तीन म्हयन्यां भितर दक्षीण गोंयांत व्हडा प्रमाणांत गोरवां एकेकडेन व्हरून दवरपाची वेवस्था. आमदारांनी आपल्या पंचायतींक अग्रिमेंट करपाक सुरू करात म्हण सांगचें. जाका लागून जे कोण गोरवां व्हरपाक येतात तांचे वांगडा जे झगडी करपाचे प्रकार जातात ते बंद जातले, अशें मुख्यमंत्र्यान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
