भांगरभूंय | प्रतिनिधी
वसय, खबरां संस्था ः बांगलादेशांतल्यान अपहरण केल्ल्या 12 वर्सां पिरायेचे चलयेक वेश्या वेवसायांत आसपावन तीन म्हयन्यांत 200 जाणांनी तिचेर लैंगीक अत्याचार केल्ल्याची धक्को दिवपी घडणूक उक्ताडार आयली. अनैतिक मनीस वेव्हार प्रतिबंध फांट्यान एनजीओच्या मजतीन चलयेची सुटका केल्या. ह्या प्रकरणांत 9 जाणांक अटक केल्या. तातूंत चार बांगलादेशी नागरिकांचो आस्पाव आसा.
26 जुलयाक अनैतिक मनीस वेव्हार प्रतिबंधक सेलान नायगाव पूर्वेच्या स्टार सिटींतल्यान 12 वर्सां पिरायेचे बांगलादेशी चलयेची सुचका केली. एक्सोडस रोड इंडिया फावंडेशन आनी हार्मोनी फावंडेशनान ही कारवाय केली. चवकशे वेळार नाडियाड, गुजरात आनी हेर सुवातींनी तीन म्हयन्यांत 200 परस चड दादल्यांनी तिचेर लैंगीक अत्याचार केल्ल्याचें चलयेन सांगलें.
चड म्हायती प्रमाण, पिडित चली शाळेत शिकता. ते एका विशयांत नापास जाले. आवय-बापूय तिका मारतले ह्या भंयान तिणें घर सोडलें. मागीर एके अनवळखी बायलेन पयलीं तिका कोलकत्ता हाडली. थंय तिणें तिची बनावट कागदपत्रां तयार केल्ली. उपरांत तिका गुजरातांतल्या नाडियाड हांगा हाडली आनी थंय एका जाण्ट्या मनशान तिचेर बलात्कार करून तिचे अश्लील फोटो काडले आनी उपरांत तिका ब्लॅकमेल करून जबरदस्तीन वेश्या वेवसायांत घुसपायली. उपरांत तिका मुंबय हाडली. ते उपरांत जायत्या सुवातींनी तिचेर बलात्कार जालो.
ह्या प्रकरणांत नायगांव पुलिसांनी आतां मेरेन णव जाणांक अटक केल्या. तातूंत मोहम्मद खालिद बापरी (33), जुबेर हारून शेख (38), शमिम सरदार (39), रुबी बेगम खालिद (21) ह्या ४ बांग्लादशी घुसखोरांचो आस्पाव आसा. उज्जल कुंडू (35), परवीन कुंडू (32) हे विरारच्या आगाशी हांगा रावतात. प्रीतिबेन मोहिडा (37) आनी निकेत पटेल (35) हे गुजरातचे. सोहेल शेख (23, आहिल्यानगर) हांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
