भांगरभूंय | प्रतिनिधी
मुंबय, खबरां संस्था ः लग्न हे पुराय जल्माचे पवित्र नाते मानतात. सात जल्म एकूच घोव मेळचो म्हूण देशांत लग्न जाल्ली बायला उपास करतात. जायतीं जोडपी जिवीतभर हे नाते तिगोवन दवरतात. जाल्यार कांय जाणांक नातें तोडपाक एक खीण लेगीत लागना. असोच एक प्रकार सध्या चर्चेत आसा. ह्या प्रकरणांत जोडप्याचें लग्न जालें. सगळे हांसत आनी खोशी जावन रजिस्टर ऑफिसांतल्यान भायर सरताले. त्या वेळार घोवाच्या तोंडातल्यान एक उतर भायर आयलें, देखून ते आयकून बायलेक खूब तिडक आयली. ती सरळ रजिस्टर ऑफिसांत गेली. जंय 3 मिनटां आदीं तांचे लग्न जाल्ले. तेच सुवातेर तिणें घटस्फोट घेतलो आनी घोवा पसून वेगळी जाली.
नेमके प्रकरण कितें?
कुवेतांत 3 मिनटां आदीं जाल्ल्या ह्या लग्नाची चर्चा सध्या संवसारभर चलता. ‘मेट्रो’न दिल्ल्या खबरां प्रमाण अधिकृत घोव-बायल जाले उपरांत फकत 3 मिनटांनी ह्या जोडप्याचो घटस्फोट जालो. घोवाच्या तोंडातल्यान आयिल्ल्या एका उतरान बायल खूब तिडकल्ली आनी तिणें सरळ घटस्फोट घेतलो.
ही घडणूक 2019 वर्साची. पूण, आतां हाचो व्हिडियो व्हायरल जाल्ल्यान ही गजाल परतून चर्चेत आयल्या. कोर्टात लग्न करुन हें जोडपें भायर सरतालें. त्या वेळार व्हकल चलतना आडखळून सकयल पडली. तेन्ना तिच्या घोवान हांसून तिची फकाणां करून तिका ‘मूर्ख’ अशें म्हणलें. मूर्ख हें उतर आयकताच बायलेक तिडक आयली. ती परतून कोर्टात गेली आनी घटस्फोट मागलो. कोर्टान तिची विनंती मान्य करून घटस्फोट दिलो. ‘सगल्यांत ल्हान लग्न’ अशें हे घडणुकेक म्हणचें पडटलें.
ह्या प्रकरणाचेर सोशल मिडियांतल्यान जायत्यो प्रतिक्रिया येवपाक लागल्यात. ‘हांव एका लग्नाक गेल्लो. त्या लग्नांत घोवान सगळ्यां मुखार बायलेचो अपमान केल्लो. त्या बायलेनय ताका घटस्फोट दिवंक जाय आशिल्लो’ अशें एकल्यान सांगलें. तो सुरवाती सावन अशें वागतालो जाल्यार ताका सोडून वचप बरें असो म्हूण आनीक एकल्यान व्हंकलेक तेंको दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
