भांगरभूंय | प्रतिनिधी
म हात्मा गांधी हांची जिणेची शिकवण आनी तांचे तत्वगिन्यान सत्य, अहिंसा आनी आत्मशिस्त ह्या तत्वांचेर आदारिल्लें आशिल्लें. तांच्या तत्वगिन्यानाची देख आमकां, ‘वायट पळोवं नाकात’, ‘वायट उलोवं नाकात’ आनी ‘वायट आयकूं नाकात’ हें सांगपी तीन माकडांच्या माध्यमांतल्यान मेळटा. मनशाचे जिणेक शांतिकाय आनी समाधान दिवपी ह्यो खूब मोलादीक गजाली. ही तीन माकडां म्हळ्यार जिणेची एक मौलीक वाट दाखोवपी मार्गदर्शक. आयज जेन्ना संवसारांत सगली कडेन नकारात्मकताय, अपप्रचार आनी लक्ष विचलीत करपी जायत्या तरेच्यो अनावश्यक गजाली घडटात तेन्ना ह्या तीन माकडांची शिकवण सगल्यांत चड प्रासंगीक थारता. आमच्या आडेकुशीक जे चल्लां ताचे कडेन आडनदर करचें अशें न्हय, मात ही शिकवण आपणावन आमी नकारात्मक गजालींचे घातक प्रभाव आमचेर जावपा सावन स्वताक आडावपाक शकतात आनी ते वरवीं स्वताची व्यक्तीगत वाड, सकारात्मकताय तशेंच सर्जनशीलताय आनी अदीक सुसंवादी समाजा कडेन वचपाक शकतात.
ह्या तीन माकडांचें तत्वगिन्यान आमकां संवसारांतल्या गजालीं कडेन दुर्लक्ष करपाक सांगना जाल्यार आमचे जिणेंत आमकां खऱ्यांनीच कितें जाय हाची वेंचीकपणान निवड करपाक सांगता. आमी खंयच्या गजालींक आनी विचारांक आमचे जिणेंत सुवात दितात ताची जर आमी थारावन निवड केली जाल्यार तो एक नियंत्रीत यत्न जातलो. ते वरवीं आमी आमच्या सकारात्मक मानसीकतेक विकसीत करपाक शकतले आनी एक संतुळीत जीण जगपाक शकतले. नकारात्मक वा हिंसक गजाली पळोवप आसूं वा कोणाय विशीं वायट उलोवप आसूं वा कोण तरी नकारात्मक गजाली उलयतात ते आयकप आसूं, आमी जाणीव पूर्वक ह्यो गजाली टाळप हें ह्या तीन माकडांचें तत्वगिन्यान. ह्या तत्वगिन्यानाक आमी दीसपट्टे जिणेत पाळो दिल्यार आमी स्वताचो मानसीक ताण आनी आपल्या जिणेंतलो खवदळ उणो करपाक शकतले. हाका लागून निमाणें, आमचीच जीण सुखी समाधानी जातली.
आयच्या आर्विल्ल्या संवसारांत भावनीक संकश्टां आनी नकारात्मकताय निर्माण करपाक शकपी अशीं जायतीं साधनां आसात. सोशल मिडिया, सेगीत चलपी खबरो आनी डिजिटल मळा वेल्यान आमचेर म्हायतीचेर मारो जाता आनी तातूंतलो अदीकसो त्रास दिवपी आनी गरजे भायलो आसता. डिजिटल सामग्रीची व्यापकपणान उपलब्द जाल्ल्यान, हिंसाचार, दुख्ख आनी समाजीक अन्याय अशा तरेच्या विशयांच्या दृश्यां कडेन लोकांचो परतून परतून संपर्क येता. म्हायती आसप गरजेचें, मात नकारात्मक माध्यमांचो चड संपर्क जायत जाल्यार हुस्को, ताण आनी निराशावादी नदर निर्माण जावपाक शकता.
खासा तरेन तयार केल्ल्या सोशल मिडिया पोस्टांच्या चड प्रमाणांत संपर्कांत आयिल्ल्यान अस्वस्थताय आनी आत्मसंशय निर्माण जाता. ‘वायट पळोवं नाकात’ हें तत्व निवडून आमी विखारी आशया सावन स्वताक पयस करूंक शकतात आनी व्यक्तीगत सुदारणे कडेन लक्ष केंद्रीत करूंक शकतात. चडांत चड प्रसिद्धी खातीर प्रसार माध्यमां नकारात्मक गजालींक आयज प्राधान्य दितात. देखून, नकारात्मकताय वगळावन वास्तवाचेर समतोल नदर दवरपाचो यत्न जाय. वैयक्तीक जिणेंत गॉसिपिंग सारकिल्ल्या नकारात्मकतायेक लागून भितरली शांतताय इबाडटा देखून अशी सुवात आनी परिस्थिती आमी टाळूंक जाय. हें तत्व आपणावन आमी सकारात्मकता, सर्जनशीलताय आनी भावनीक स्थिरताय वाडोवपी वातावरण तयार करूंक शकतात.
शब्दांचो आमच्या भावनांचेर आनी विचारांचेर खोलायेन परिणाम जाता. आयच्या परस्पर संबंदीत संवसारांत मतां, टिका आनी चुकीची म्हायती मेळटा जी तांच्या मनाची शांती खंडीत करपाक शकता. अविश्वसनीय स्रोत गाळपाक शिकल्यार गरजे भायर ताण आनी गोंदळ जावंक पावचो ना. हेरां कडल्यान जावपी खर उतरांक लागून जायत्या जाणांक आत्मविस्वास उणाविल्ल्याची भावना येता आनी ही एके तरेची ख्यास्त भोगची पडटा. निराधार टिकां कडेन दुर्लक्ष करप आनी स्वताच्या मोलाचेर लक्ष केंद्रीत करप हें वैयक्तीक वाडी खातीर म्हत्वाचें. वेंचीक आयकप हें तत्वगिन्यान आपणावन आमी मानसीक आनी भावनीक लुकसाणा सावन स्वताची राखण करूंक शकतात.
उतरां भितर मनशाक वा समाजाक बांदपाची वा नश्ट करपाची शक्त आसता. हेरां विशीं वायट उलोवप, नकारात्मकताय पातळावप वा गरजे भायर वादांत वांटो घेवप हाका लागून संबंद इबाडपाक शकतात आनी विखारी वातावरण तयार जावंक शकता. अपमानां सावन, खर टिका वा उलोवणी पातळावपा पसून पयस रावप ही वृत्ती आमकां शांत आनी आदरपूर्ण वातावरण सांबाळपाक मजत करता. नकारात्मकतेंत वांटो घेवचे बदला, उतरांचो वापर करून प्रेरणा दिवप, प्रेरीत करप आनी हेरांक आदार दिवप अर्थपूर्ण संबंद आनी सकारात्मक समाज तयार करपाक मजत करता. केन्ना केन्ना, मौन ह्या उतरा परस चड बळिश्ट आसता. उतरां वरवीं हानी जावंक शकता अशे परिस्थितींत ‘उलोवप ना’ हें तत्व निवडप म्हळ्यार बुद्धी आनी आत्मसंयम हांचें लक्षण. ‘वायट उलोवं नाकात’ ह्या गजाली वरवीं दयाळूपण आनी समजुतीचे संस्कृतायेंत आमी योगदान दिवंक शकता. हाका लागून आमचे मदीं बरे संबंद निर्माण जावंक शकता.
तीन बुदवंत माकडांचें तत्वगिन्यान पयलीं परस आयज चड प्रासंगीक आसा. विक्षेप, नकारात्मकताय आनी गरजे भायर ताण दिवपी लोकांनी भरिल्ल्या संवसारांत ‘वायट पळोवं नाकात’, ‘वायटआयकूं नाकात’ आनी ‘वायट उलोवंक नाकात’ हें तत्वगिन्यान आपणायल्यार जिवीत शांतिकायेन भरिल्लें आनी समाधानी जावंक शकता. ह्या पद्दतीक आपणावन, व्यक्ती सकारात्मक मानसिकताय निर्माण करूंक शकतात, भलायके खातीर बरी मुळावण तयार करूंक शकतात आनी जिणेंत खऱ्या अर्थान कितें म्हत्वाचें हाचेर लक्ष केंद्रीत करूंक शकतात. तीन माकडां आमकां एक याद करून दितात की सूख आनी शांती भायल्यान न्हय जाल्यार भितरल्यान येता. जाणीवपूर्वक नकारात्मकताय वगळावन आमी आशावाद, बुद्धी आनी भावनीक बरेपण हांणी भरिल्लें जिवीत जगपाक स्वताक सशक्त करपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
