भांगरभूंय | प्रतिनिधी
संवसारीक टी-20 क्रिकेट सर्त आपल्या निमाण्या पांवड्यार पावल्या. भारत, पाकिस्तान, न्युझिलॅण्ड आनी इंग्लंड ह्या पंगडांनी सेमी फायनलींत सुवात मेळयल्या. पयली सेमी फायलनल 9 नोव्हेंबराक न्युझिलॅण्ड आनी पाकिस्तान, जाल्यार 10 नोव्हेंबराक भारत आनी इंग्लंड ह्या पंगडां मदीं मॅच जातली. ह्या चारांतल्या तीन पंगडांक किताब जिखून इतिहास घडोवपाची संद आसा.
संवसारीक टी-20 क्रिकेट सर्तीच्या इतिहासांत फक्त वॅस्ट इंडिजानूच दोन खेपे किताब जिखला. ताणें 2012त आनी 2016त ही सर्त जिखल्या. जाल्यार भारत, पाकिस्तान, इंग्लंड, श्रीलंका आनी ऑस्ट्रेलिया हांणी दरेकी एकदा करंडाचेर आपलें नांव कोंतरायलां. श्रीलंका आनी ऑस्ट्रेलिया हांचें आव्हान सुपर 12त सोंपला.
भारत, पाकिस्तान आनी इंग्लंड हातूंतलो खंयचोय एक पंगड किताब जिखता जाल्यार तो वॅस्ट इंडिजाची बरोबरी करपाक शकतलो. भारतान 2007त वस्तादपण जोडिल्लें. ते उपरांत ताका परतून किताब जिखपाक जमूंक ना. 2009त पाकिस्तान जैतिवंत थारिल्लो, जाल्यार 2010त इंग्लंडान ही सर्त जिखिल्ली.
सेमी फायनलींत सुवात मेळोवपी चारांतल्या फक्त न्युझिलॅण्डाकूच अजून मेरेन वस्तादपण जोडूंक शक्य जावंक ना. जर तो हे खेपे किताब जिखता, जाल्यार क्रिकेट मोग्यांक नवो आनी वट्ट सातवो चॅम्पियन मेळटलो.
न्युझिलॅण्डान सगल्यांत पयलीं सेमी फायनलीची पात्रताय मेळयिल्ली. न्युझिलॅण्डान आपले पयले मॅचींत ऑस्ट्रेलियेक 89 धांवड्यांनी हारोवन सर्तीक उत्कृश्ट रितीन सुरवात केल्ली. न्युझिलॅण्डाक अजून मेरेन संवसारीक टी-20 सर्त जिखपाक जमूंक ना. पूण, हे खेपे जिखपाचो हावेस घेवन तो ऑस्ट्रेलियेंत आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
